October 2022 atanga January ni 3, 2023 thlengin Mizoram Police-in Halpuah leh halmawi khapna thupek bawhchhia mi 43 an man tawh.
IGP (Hqrs.) John Neihlaia’n THE ZOZAM TIMES zawhna chhangin halpuah leh a kaihhnawih khapna thupek bawhchhiat thubuai 40 an ziahluh tawh thu leh mi 43 an man tawh thu a sawi a. “Tuna thubuai kan siam siam tawh te bakah hian report lut bawhzui mek a la awm a, dan thubuai hi a la pung leh thei,” a ti.
John Neihlaia chuan, kumthar vuakvet – December ni 31, 2022 atanga January ni 2, 2023 inkarah Mizoramah Police-in thubuai chi hrang hrang 59 an ziaklut tih sawiin, thubuai ziahluh zinga a tam ber chu halpuah leh a kaihhnawih khapna thupek bawhchhiat thubuai a nih thu a sawi.
December ni 31, 2022 atanga January ni 2, 2023 thlenga thubuai ziahluh tamna ber chu Aizawl distrit a nih thu sawiin, thubuai 39 ziahluh a nih thu IGP (Hqrs.) chuan a sawi a. District dang – Lunglei-ah 3, Siaha-ah 4, Champhai, Kolasib leh Hnahthialah te 2 theuh, Serchhip leh Mamit-ah 3 ve ve leh Saitual-ah 1 ziahluh a nih thu sawiin, Lawngtlai leh Khawzawl district-ah thubuai ziahluh a awm lo niin a sawi thung.
IGP (Hqrs) chuan kum 2022 Krismas leh Kumthar 2023 vuakvetah Mizoramah buaina leh pawikhawihna liantham thleng a awm lo niin a sawi a. Krismas leh kumthar vuakvetah boruak a muanawm thawkhat niin a sawi bawk.
(Photo credit : Tlauliana Bualchhuak)