Saihnuna Memorial Society (SAMSO) leh Art & Culture Department tangkawpin Leng khuaa Lallungkawna Leng lal, hlaphuah thiam hmingthang ni bawk Saihnuna Lungdawh an siam chu vawiin khan Art & Culture Minister R Lalzirliana’n a hawng.
Leng lal Saihnuna Fanai hian Pathian fak hla 28, khawhar hla 32 leh hla dang 24, a vaiin hla 84 a phuah nia sawi a ni a. Fanai lal ropuia sawi Rorehlova thlah kal zel niin, kum 1927 atangin Leng khuaah a lal tanin, lal ban thlengin a lal. A rorel thiam avangin Bawrhsap hnen atangin lawmman atan Silai a dawng nghe nghe.
A thu leh hla leh a sulhnute vawnhim zel a nih theih nan mithahnemngai ten Saihnuna Memorial Society (SAMSO) an din a, an ni hian Saihnuna Fanai thu leh a hlate dahkhawmna lehkhabute siamin, thlan lung pawh kum 2016 khan Leng khaw thlanmualah an phun tha tawh a ni.
Art & Culture Minister R Lalzirliana chuan Saihnuna chu a mingaihsan a nih thu sawiin, kum 2016-a a lungphunnaah pawh a tel thu a sawi a. A chanchin ziahna lehkhabute buatsaiha a Lungdawh te hawn a ni ta zel chu lawmawm a tih thu leh hengah te hian amah a ngaihsan avang leh Mizo hnam tana a hlutna hre ve phaka a inngaih avanga a tel ve zel thu a sawi bawk.
Saihnuna hla phuah zing ami ‘Ka taksa lungngai mahsela, vanramah thlain ka leng thin’ tih hla te, ‘Rihlipui hi thlafam leng kaina’ tih hla leh ‘Ni leh Thla leh Arsi an dang chuang lo’ng e’ tih hlate chu a lungdawh hawnnaah hian Laithangpuii’n a sa a, Saihnuna thlah kal zel ami, Leng khaw zaithiam Vanlalhluna’n ‘Tlang a dang lung a leng e mai’ tih hla a sa bawk a ni.