Central YMA Executive Committee (CEC) vawiina thukhawmin, Bangladesh atanga an sahimna zawnga Mizorama luh tum Zofa ten harsatna an tawk thin pawi an tih thu an sawi a. An tawrhna hriatpuina atan tun thla ni 9 (Thawhtanni) chhun dar 12-ah Raj Bhavan hmarlam gate bulah thutkhawm huaihawt an tum.
Bangladesh-a Zofate tawrhna hriatpuina thutkhawmah hian Mizo mipuite thawkchhuak theuh turin CYMA chuan a sawm a ni.
CYMA CEC thukhawm chuan “Thi leh dam kara leng kan unau, an sahimna tur nia ngaia India ram rawn pan ten ramria harsatna an tawk thin hi a pawi kan ti” an ti a. “YMA chuan mihringte dikna chanvo hre reng chunga lo dawngsawng turin India sorkar a ngen a ni” an ti. Sahimna zawnga India rama lutte mamawh, ei leh bar, mut lumna leh chenna turte ngaihtuahsak turin India sorkar an ngen bawk.
Hetih lai hian Sahimna zawnga Bangladesh atanga Mizorama luh tum zinga mi, Pastor Sawmkhup chu nizan dar 8:30 vel khan ramhnuai-ah a boral a. Chanchin buatsaih lai hian a ruang hlawm turin mitlawmngaite an thang mek. CYMA CEC vawiina thukhawm chuan he thihna hian YMA te a thawng hle tih sawiin, tun hnuah hetiang vanduaina hi thleng nawn tawh lo se an duh thu an sawi bawk a ni.