Kum 2022 kumhlui thlah zâna boruaka bawlhhlawh nawi leng vel (PM10) khawlin a chhinchhiah danin, zanlai dar 12-1 inkâr, hâlpuah hâl vânglaiin 285µg/m3 a kai chho a, Kum 2021 zanlai dar 12-1 inkâra 151µg/m3 aiin a lêt hnih dâwnin a sâng a ni.
Mizoram Pollution Control Board (MPCB)-in Sikulpuikawna Continuous/Automatic Air Quality Monitoring Station an bunin boruak dinhmun a chhinchhiah atanga a lan dânin kum 2022 kumhlui thlah zânah hâlpuah leh hâlmâwi hâlin boruak a tibawlhhlawh nasa zual hlê a. December ni 31, 2022 chhun lamah chawhruala 67µg/m3 a nih laiin zanlai dar 12-1 inkâr, hâlpuah hâl vânglai chuan 285µg/m3 a kai chho a. Boruaka bawlhhlawh nâwi lêng zînga tê zual leh hlauhawm zual (PM2.5) pawh December ni 31, 2022 chhun lamah 17µg/m3 a nih laiin zanlai dar 12-1 inkârah chuan 67µg/m3 a kai chho bawk.
Aizawl khaw chhûng tehna hmun dang – Khatla, Laipuitlang, Dawrpui leh Bawngkawn-ah te pawh kumdang aiin boruaka bawlhhlawh leng zel a sang a, Bawngkawnah 189µg/m3 leh Dawrpuiah 130µg/m3 kaiin, kum hmasa 2021 aiin a sâng hlê niin sorkar thuchhuahin a tarlang a. Mizoram district khawpui dangah pawh kum hmasa lam aiin a sâng chho deuh vek a, Aizawl ai chuan a zia vek thung a, 100µg/m3 thleng phâ an awm lo niin sorkar thuchhuah chuan a tarlang.
Sorkar thuchhuahin a tarlan danin Hâlpuah hâl vâng hian boruak a bawlhhlawh phahin National Standards (pawm theih chin), 50µg/m3 a pêl thui hlê a, Air Quality Index Stage 6 awmah Stage 4-na a kai pha a ni.
Ri bengchhen dân pawh December 31, 2022 zan khan – Bawngkawn, Laipuitlang, Dawrpui leh Khatlâ-ah te teh niin, hâlpuah hâl vânglaiin chawhrualin ri rin zâwngin 50dB a pêl vek a; a rin lai berin Bawngkawnah 104.7dB, Dawrpuiah 90.6dB, Laipuitlangah 100.9dB leh Khatlaah 90.7dB-te niin, ri bengchhen phal chin, 45dB a pêl thui hlê hlawm bawk.
(Photo credit : Mala Pachuau)