PHE Deptt-in Mizorama chhungkaw 1,34,028 awm mekah chhungkaw 97,079 te hnenah tui thianghlim in tur a pechhuak thei tawh a, hei hi za zelah 72 vel tling tawhin hmabak chhungkaw 36,949 tuamchhuah tumin hma an la leh mek.
PHE Deptt. changtu, Dy. Chief Minister Tawnluia hovin nimin khan PHE Deptt. hotute chu an hnathawhte thlirletin Multipurpose hall, Berawtlangah an thukhawm a. Kumin July thla-ah chuan Mizorama chhungkua zawng zawng tui connection pek chhuah vek an tum thu an sawi.
Sorkar thuchhuahin a tarlan danin, chhungtin hnena tui connection pekna tura hmalakna Jal Jeevan Mission hnuaiah Mizorama khua leh khaw per awm zawng zawng 742-a 333-ah he hlawhtling taka hmalak a ni tawh a, a bak khaw 515-ah hmalak leh mek a ni. JJM hnuaiah scheme 848 kalpui niin, hemi hnuaia scheme 26 atan State level sanction committee a thu tawh a, sorkar laipui pawmpuina nghah mek a ni bawk.
Dy. Chief Minister chuan PHED mawhphurhna a san thu sawiin, mipui pawhin anmahniah beiseina sang tak an nei tih a sawi a. PHE chu engineer te thiamna hmanga mipuite tui thianghlim in tur ngaihtuahtu, faina leh thianghlimna kawnga hmalatu leh bawlhhlawh sawngbawl thlenga khawihtute an nih avangin Mizoram mipuite tan an hnathawh a pawimawh takzet thu a sawi.
Thawktu indaihlohna karah an hna a pun zel thu pawh Tawnluia chuan sawiin, indaiklo tak chunga thawktu ten an mawhphurhna tha taka an kengkawh thei chu lawmawm a tih thu a sawi bawk a ni.