Central YMA buatsaih ‘Bangladesh Zohnahthlakte Thlavang Hauh’ punkhawm nimin khan neih a ni a. He huna thu sawitu, Central YMA President R Lalngheta chuan Bangladesh Zohnahthlak raltlan ramhnuaia vakvai mekte chhan nan dan hrul hretah pawh pen chhuah a tul tawh tih a sawi a. Ram hruaitu MLA rualte pawh raltlante dinhmun ngaihtuaha a hmuna tlawh turin a ngen.
Aizawl Raj Bhavan South Gate bula punkhawmnaah Central YMA president chuan Bangladesh Zohnahthlak unaute thlabara Mizoram pante mangang au ri hriat a hrehawm tih a sawi a. “Vawiina kan ram hruaitute, in hnathawh tawhnate ropui kan ti. Amaherawhchu, beisei kan la nei,” tiin, ruling party an ni emaw, eptu party an ni emaw, ram leh hnam aiawha dinga an office nuam tak aiin Parva thleng hram tura a beisei thu leh vawi khat tal chu tlawh turin a ngen.
R Lalngheta chuan, “Kan hnampui sahimna zawnga Mizoram rawn luh tumte chhan turin a taka kan chet chhuah a ngai tawh a. Mizoram khawpui bera awm Mizo mipuite hian eng nge kan tih ve dawn tih hi a thara kan ngaihtuah a ngai a, helaia inhrosa mai lo hian a taka kan chet chhuah a tul tawh a ni,” a ti.
“Chief minister leh sorkar kan au a, anni’n theihtawp chhuah mah se, sorkar laipui a ngen lui tlat a. Chumi su lui tlat tur chuan Lalnu Estheri’n a hnampuite chhana lal hmaa a ding lui tlat angin, kan hnampui ramhnuaia vakvai mekte chhan turin ke ‘i pen chhuak ang u,’ tiin ka sawm che u a ni,” a ti.
Thlamuanna zawnga an inpui, Mizoram an panna kawnga BSF mai ni lo, BSF dang kir tura lo hek tura chu hriat an nih thu leh, an sim loh chuan Mizo mipuite an chet tur thu a sawi bawk.
YMA te, YLA te leh mi hrang hrangin Mizorama an luh theihna tur kawng dap thin mah se, BSF-ten an luhna tur hmun an dang chep vek tawh tih sawiin R Lalngheta chuan, “Engti zawng pawha Mizoram an rawn luh theihna kawng kan zawn a ngai tawh a. Ngaihtuahna thar nen kan ram leh hnam chhan nan i tangrual ang u,” a ti a; Bangladesh-a Zohnahthlak unaute chu zalenna suala MNF rammute ei tur lo pea lo tuam hlawmtute an nih thu a sawi.
R Lalngheta chuan, “BSF chakna hmanga kan unaute dang zel lo hian, kan unaute zalen tak leh thlamuang taka an awm theihna tur hian rawn chhuah rawh se,” tiin sorkar laipui chu a ngaihtuahna leh a rilru thlak turin a ngen.
“India sorkar hnena ka ngen duh chu, Mizorama Union Home Minister Amit Shah a lo kal khan, Mizo Battalion BSF din min tiam a, Mizo ngei hmangaihtute ramri-a an duty theih nan min dinsak ngei rawh se tih hi ka ngen duh a ni,” a ti bawk.
Central YMA Vice President Lalhmachhuana kaihhruai punkhawmah hian MZP president leh MSU president ten thu an sawi a. Central YMA Gen Secretary Prof. Lalnuntluanga chuan report pein, raltlante tanpuina tura sum luhkhawm dan leh tanpuina pek chhuah dante a sawi a. Central YMA Asst Secy Prof. Malsawmliana kaihhruaiin ramri-a boral, Pastor Sawmkhupa sunna hun hman a ni.
Punkhawm hun hman zawh hian Central YMA hruaitute chuan Mizoram larsap kaltlangin Union Home Minister Shah hnenah raltlante tana hmun him ngaihtuahsak tura ngenna memorandum an theh lut nghal a ni.
Bangladesh Zohnahthlakte Thlavang Hauhna punkhawmah hian raltlante tanpuina tura mahni remchan ang ang pawisa thlakna tur bawm hun a ni a, mi mal leh pawl hrang hrang atang sum eng emaw zat a lut a ni.
He hun hman tur avang hian political party hrang hrangten kumin atana an pisa hawn tan tur chu an thulh hlawm a. MLA eng emaw zat hmel hmuh tur a awm bakah NGO hrang hrang hruaitute an tel bawk a ni.