President hlui, Jair Bolsonaro-a thlawptuten Congress, presidential palace leh Supreme Court an luhchilh hnuah Brazil-a police-te chuan an zinga mi tam tak an man a, an hmun thutchilhte pawh an thunun let leh tawh.
Pathiannia Twitter-a an tar lanah police chuan an khawpui, Brasilia-ah Bolsonaro-a thlawptu, tun hnai inthlana a chak loh pawmn duh lotu sang chuangte an chet hnuah mi 300 vel an man thu an tar lang a. President hlui thlawptute hi kum hnih kal taa President Donald Trump-a tantuten United States Capitol an luhchilh ang deuh chiah kha a ni.
“Tute nge tel tih hriat vek a nih hma chuan chhui chhunzawm zel a ni ang,” tiin police chuan an sawi.
Pathiannia mipui chetna avang hian thi leh hliam an awm hriat a ni lo va; mahse, sorkar hmun luhchilhtute hian thil tam tak an tichhia a; bungrua an tichhia a, presidential palace tukverh darthlalak an vaw keh a, Congress chhunga tui phuhna hmanga tui phuhin a chhungah tui a tling nasa a; Supreme Court chhunga ceremonial room chhung an suasam nasa hle bawk.
Mipui chetna hian darkar thum chuang a awh a. Bolsonaro hi October thla khan leftist President Luiz Inacio Lula da Silva chuan a hneh tawk a ni.
Sao Paulo state-a thuthar lakhawmtute a kawmnaah Lula chuan hetianga mipui an chetna hi Bolsonaro fuih phur vang a nih thu a sawi.
“Hetiang thil hi tun hmain a la thleng ngai lo,” tiin Lula chuan a sawi a. “Hetiang titute hi hriat chhuahah hrem an ni ang,” a ti.
President hian Brasilia tlawh nghalin building leh thil chhiate a en kual tih Brazil-a TV Globo chuan a tar lang.
Far-right Bolsonaro hian inthlanah khan hneha a awm pawm duh lovin US-a Florida state-ah a term zawh hma lawkin a zin daih a. Amah thlawptuten sorkar hmun pawimawh an luhchilh lai hian darkar ruk zet engmah sawi lovin a awm hman a. Lula-a’n a inrawlh tih a sawi hnuah erawh ‘rawva taka chetna leh vantlang building beih’ chu tha a tih loh thu Twitter-ah a tar lang zui a. President-in a puhna pawh a pha bawk.
Brasilia-a thil thleng hi khawvel ram hrang hrang hruaituten an dem thu an sawi hlawm.
US President Joe Biden chuan ‘mipui rorela beihna leh muanawm taka thuneihna inhlan tur tihbuaina’ tiin a sawi a. Brazil-a mipui rorelna sorkar chu Washington-in a thlawp tlat tih a sawi bawk.
European Council President Charles Michel pawhin a dem tak zet thu Twitter-ah a tar lang a. French President Emmanuel Macron chuan Brazil sorkar a thlawp thu a sawi a, Lula hnenah pawh France chuan a thlawp tlat tih a thawn bawk.
Latin American hruaitute pawh tawng chhuakin Chilean President Gabriel Boric chuan ‘dawihzep taka mipui rorelna beihna’ a ti a. Mexico President Andres Manuel Lopez Obrador pawhin ‘helna nena thuhmun’ tiin a sawi bawk.
US-a Democratic party hruaitute pawhin an dem thu an sawi hlawm a, Washington chuan Bolsonaro pawh an rama awmtir reng a phal loh a ngaih thu an sawi hlawm.
“Mipuiin lungrual takin Lula-a sorkar hi an thlang tling tih hi kan pawm dan a ni,” tiin Congresswoman Alexandria Ocasio-Cortez chuan Twitter-ah a tar lang a. “US pawhin Florida-a Bolsonaro a awm him hi a phalsak lo ngei tur a ni,” a ti bawk.