Pawl hrang hrang aiawha pungkhawmte chuan tun hnaia Manipur driver, Nagaland-a thah a nih duh loh lantir nan Imphal-Moreh kawngpui an dang tan.
Manipur driver hi Khuzama, Nagaland-ah a ruang chhar a ni.
Moreh Drivers’ Union leh tun hnaia din thar, Joint Action Committee (JAC) against the killing of Yanglem Priyobrata huaihawtin lirthei khalhtu pawl hrang hrang chuan kawngpui hi an dang a. Imphal-ah Yaiskul parking-ah awm khawmin Moreh-ah Ima Kondom Lairembi-ah kawng an dang bawk.
Kum 48 mi, Yanglem Priyobrata-a hi Nachou Awang Leikai, Bishnupur district, Manipur-a cheng niin December 30 atang khan a chin hriat a ni lo va. Hmuh hnuhnun ber chu Nagaland-a a zin tur niin a ruang hi January 7 khan Khuzama khua, Nagaland-ah chawhma dar 11.30 velah hmuh a ni.
That ngei nia hriat a nih avangin Manipur-ah chuan hmun hrang hrangah duh lohna a nasa hle.
Lungawi lote hian a titute chu na taka hrem ngei leh chhui chhuah ngei an phut a ni.
Hetih lai hian Manipur police chuan he thihna thleng chungchangah hian Nagaland-a an thawhpuite dawr rengin a chhui hna an thawk mek zel.