India sorkar hmalaknain Kashmir chhim lam, Anantnag district-a Dooru block huam chhunga mi, Tethan khua chuan kum 75 dawn hnuah electric an nei ve ta.
Mi 200 chauh chenna khaw kilkhawr tak hian PM Development Package scheme hmangin electric hi an hmu ve pha ta a ni.
Anantnag tlangrama awm, Tethan-a chengte hian kum 75 dawn hnuah an khuaah bulb an tieng ve ta a ni.
Kum 75 vel zet chhung khan he khuaa chengte hian an eng mamawh phuhruk nan thing an tuah a, laltin leh bati ringawt an ring a ni.
Mi cheng pakhat, Fazul-u-din Khan chuan, “Vawiin hian a vawi khat nan electric kan dawng ve ta a. Kan fate pawhin electric êng hnuaiah lehkha an zir ve thei dawn ta a, an hlim ngei ang. Electric tel lo kha chuan buaina tam tak kan nei a. Thing kan tuah a ngai a, tunah erawh chuan kan buaina tam tak a kiang tawh dawn a. Sorka leh a hnuaia department chungah kan lawm hle a ni,” a ti.
Eng an hmuh chuan mi chengte chuan lawmin hlim takin an lâm hial a ni.
Zaffar Khan-a pawhin, “Kum 60 ka ni tawh a, a vawi khat nan electric kan nei ve ta. L-G leh DC chungah kan lawm a, power department chungah kan lawm hle bawk a. Tun hmaa mite khan electric thiltihtheihna kha an hmu ve hman ta lo va, vawiina mite erawh sorkarin min pek avangin kan vannei hle a ni,” a ti.
Electric department leh district thuneitute hmalakna avangin Anantnag atanga km 45 vela hlaa mite hian êng an nei ve ta a ni.
Electricity department thuneitu pakhat chuan he khuaa electric pek luh hna hi a rang thei ang bera thawh a ni tih a sawi.
Fayaz Ahmad Sofi, Technical officer, Power Development Department, Anantnag chuan, “Kum 2022 atang khan bul kan tan a; mahse, High Tension line avangin harsatna kan han nei deuh va, vawiinah erawh chuan kan ti thei ta a. 63 (KV) transformer kan bun a, he khuaa chengte hian kum 75 hnuah electric an hmu thei ta a ni,” a ti.
Tethan khuaah hian transformer, 38 High Tension line leh 57 LT ban (a vaiin ban 95) dah a ni a, in 60-te chu êng pek vek an ni tih Sofi chuan a sawi bawk.