Kum 2021 atana ‘Kumthar thutiam’ nei tawhte an awm mek laiin la ngaihtuah fat fat te pawh an awm a, ‘a ngai hran lo’ tite pawh an kat nuk tho.
Chutih laiin, mimal ang pawha hmasawnna tur leh intuaitharna tur atan ti-a ‘fing’ taka thutiam neite pual liau liau-in heng thutiam te hi tha taka vawng a, a taka kalpui anih theih dan tur kawng chi nga (5) tarlan a ni dawn.
Thutiam hi bawhchhiat a awl rual rualin uluk taka chhiar a, hmalak zui nghal anih chuan hmasawnna a thleng ngei ang.
THUTIAM SIAM HNEM SUH
Mithiamte’n an sawi danin, thutiam pathum aia tam siam thinte hi a hnu lamah an zuzi duh hle mai a. Chutih laiin, remhre taka tikawp thin te erawh an nihlawh thin. Entirnan: ei leh ina insum i tum chuan, taksa insawizawi thin tumna thutiam neih nghal a tha.
FING TAKIN THUTIAM NEI RAWH
Mi tam zawk hian engemaw tih tawh loh tur ang chite’n thu an tiam thin a, Zial nghei tihte emaw thil thar tih leh kalpui te hi a ni fo thin. Chutih laiin, ‘Tih tawh loh tur’ tihte hi kawng chanve pawh thlen hmaa thlauhthlak a ni duh hle mai a, a chhan chu, thingpui in tam tum tawh loh hnu-a chini (sugar) tam tawk kawl rengte hi buaipui zui a ngai leh nge nge thin.
INRINTAWKNA NEI RAWH
“Tih tak takna leh tum tak takna a awm lo a nih hi” tia mahni inmawhchhiat nghal thinte hi thutiam bawhchhe nghal leh mai thinte an ni tlangpui. hma la tan dawn ek ek chauha inrinhlelhna nena bul tan nghal chawt te hi thil awm thei a ni a, mahse hlawhchhamnain a umzui mai thin. Chutih laiin, a tir lamah chuan a harsa hle dawn a, tihsual neih zauh changte pawh awm thei a ni tih erawh pawm a ngai thung.
RUAHMANNA FELFAI TAK NEI RAWH
Phurna leh châkna a awm rual hian ruahmanna felfai tak neih erawh a ngai hle. Thil mawm lam ei tlem a, eitur hrisel chauh ei tura thutlukna i siam dawn chuan harsatna awm thei ang chi te en lawk a, a chinfel dan tur nen lam ziah chhuah hi a finthlak hle a ni.
‘DIARY’ NEI RAWH
Mithiam tak takte chuan mahni thil tum leh hmalakna ziak fel thlip thlep a, bawhzui nghal char char thinte hi an hlawhtling tlangpui niin an sawi. nitin chanchin ziahna ‘Diary’ -ah hian insawizawina neih buaithlak zia te, zial nghei harsat dan te leh mahnia beidawnna awm thei te nen lama ziah anih avangin chu chuan hun lo la kal turah pawh fimkhurna leh inulukna a thlen lawi si a ni. Mizia, chezia leh rilru sukthlekna te, chin dan thlak danglamte hi thil harsa tak a nih laiin, kawng lehlamah chuan hlawh-tlinna hian lawmman tam tak a kengtel bawk si a ni.