Aizawl: Mizoram Journalists’ Association (MJA) President C Lalrambuatsaiha chuan social media-ah thu dik leh dik lo thliar thiam a harsat thin avangin mi tam takin chanchinbu ngei atanga thu thar hriat an duh leh tan tih a sawi.
Nimin khan MJA Gen. Hqrs chuan Aizawl Press Club-ah 2023 kum thar thingpui inho a buatsaih a. Thusawitu, MJA president chuan social media leh Covid-19 hripui lengin print media a titlahniam tih sawiin, “Tho chhuak leh turin kan tan mar thar leh a ngai a, engtin nge kan tan mar leh ang tih kan ngaihtuah tlan a ngai,” a ti.
C Lalrambuatsaiha chuan social media-ah thu dik leh dik lo a darh nasa a, thu dik leh dik lo thliar thiam a harsat thin avangin mi tam takin chanchinbu ngei atanga thu thar hriat an duh leh tawh avangin, chanchin thar lak khawmah tan lak thar a tul tih a sawi.
“Khawvela mi hlawhtlingte hi tluchhe fo tawh, hlawhchham tawh thinte an ni. An ti hram hram a, hlawhtlinnain a um zui thin. Mi beidawng duh lo, bei hram hramte an hlawhtling thin,” a ti a; chanchinbute pawh social media-in ei chhe deuh rih mah se hnual phah nan hmang loa tan la thar zel turin MJA member-te a chah.
MJA Gen. Hqrs Treasurer C Lalhmachhuana’n he hun hi a kaihruai a. Inkhawmah hian MJA member 40 chuang telin, heng zingah India rama working journalist upa bera chhal leh MJA president hlui, Lalbiakthanga Pachuau, kum 96-na hmang mek pawh a tel a ni.