MNF thalaiin Central YMA-in nimina Bangladesh-a Zofa harsatna tawk, Mizorama raltlante thlavang hauhna inkhawm a buatsaih chu lawmawm an tih thu leh an thlawp thu an sawi.
Bangladesh rama Zohnahthlak chen tamna Chittagong Hill Tracts-a hmasang aṭanga lo cheng hmasa tawh Zohnahthlak ten nekchep an hlawh nasat avanga an dinchhuah theihna tura thuneihna sang zawk Bangladesh sorkar laka an sual mek chu an thlawp thu MNF thalai chuan an sawi a. Hemi avanga harsatna an tawh avanga Mizorama raltlan mek te chu Mizoram sorkarin a theih ang anga lo tuamhlawmin, ei leh in tur te, thawmhnaw leh mutbu bakah damdawi leh tul dang te a thlawnin a sem mek niin an sawi.
India sorkar chu United Nation Refugee Convention 1951 leh 1967 protocol pawmtu a nih loh avangin Myanmar leh Bangladesh aṭanga Zofa raltlante chu sorkar laipuiin a ngaihsak duh lo niin MNF thalai chuan an sawi a. Heti chung hian Mizoramah chuan Zoramthanga kaihhruai sorkarin chhawmdawl hna a theih ang tawkin a kalpui mek niin an sawi.
Myanmar aṭanga raltlan, Mizoram hmun hrang hrang camp 160 a awm te tuamhlawmna turin Mizoram sorkarin Rs. nuai 400 chuang a semchhuah tawh bakah zirlai 6000 chuang te zirna engkim tumsakin a thlawnin a enkawl mek niin MNF thalai chuan an sawi a. Bangladesh aṭanga Zofa raltlante tuamhlawmna turin tun thlaah pawh Rs. nuai 35 chuang a seng tawh niin an sawi bawk.
Bangladesh aṭanga Zofa raltlante Mizoram sorkarin a theih anga tuamhlawm hna a kalpui laiin, Zofa Mizorama luh tum te sorkar laipuia Union Home Ministry-in BSF hmanga a dang thin chu pawi an tih thu MNF thalai chuan an sawi a. Sorkar laipui hmalakna chu an dem thu sawiin, Mizoram sorkar leh Mizoram aiawh MP pahnih C. Lalrosanga leh K. Vanlalvena te hmalaknain rah ṭha a chhuah thuai an beisei thu an sawi bawk a ni.