Aizawl: Indian Institute of Mass Communication, North-Eastern Regional Campus buatsaih ni nga awh tur, ‘Short Term Course for Media Persons from Sikkim’ chu nimin khan Lok Sabha MP C. Lalrosanga’n Mizoram University Guest House Seminar Hall, Tanhril-ah a hawng.
January 9–13, 2023 chhunga neih turah hian Sikkim sorkar hnuaia Information & Public Relations Department official pali leh journalist 16 an tel a ni.
Training course hawngtu, Lok Sabha MP chuan Sikkim atanga media person an hnaa tui leh thahnemngai tak tak hmel a hmu chu lawmawm a tih thu sawiin, Sikkim-a journalism hmasawn danin a tilawm hle tih a sawi.
“Tunlai khawvelah journalist-te tan taimak chhuah lehzual mai bakah dil chhut lehzual a tul tawh hle a, digital media hi kan hman thiam a kan chhawr tangkai a pawimawh hle a ni,” a ti a. “Social media a thang chak a, hetih rual hian thuthang lengvel a tam bakah rinthu sawi darh vak vak a tam ta hle a, hmun tinah media lama zirna leh thiamna nei lem loten sum siam nan YouTube channel an siam a, heng hian mipuiteah chiaina leh rilru phirna nasa takin a thlen a, hengte a nih avang hian journalist dik takte chuan tan kan lak a ngai a, mipuite hnenah eng hi nge awih tura awih loh tur, tihte kan zirtir a ngai a, thudik leh rintlak mipuite hnena thlen turin tan kan lak nasat hle a ngai a ni,” a ti.
Journalist-te chu an hnathawhna kawngah dikna chawi nung tura chahin journalist thu leh hla hi mipuite ngaihdan leh sukthlek siamtu a nih fo avangin mawhphurhna lian tak an nei tih a sawi bawk.
IIMC North-East Campus Regional Director L.R. Sailo pawhin inlawmna thu sawi pahin course an pek tur chungchang a sawi fiah a, Sikkim Chief Minister Prem Singh Tamang hmalaknaa short term course hi buatsaih a nih thu a sawi.