Bangladesh-a Zohnahthlakte thlavang hauhna hun an hman hi Mizorama political party hrang hrangin thlawpin, kum 2023 atana an pisa hawng tura ruahmanna an lo neih tawhte pawh an thulh.
Thuchhuah siamin rorel lai party MNF chuan Central YMA bul tuma ‘Bangladesh Zohnahthlakte Thlavang Hauhna’ a huaihawt chu an thlawp thu an sawi a. Bangladesh mipui raltlante chhawmdawl nan hian Chief Minister Zoramthanga hmalaknain Rs. nuai 30 pek an lo nih tawh thu te, raltlante chhawmdawlna tur hian ei leh in bakah damdawi, silpauline, mutbu, thleng leh thosilente pawh pek an lo nih tawh thu te, Bangladesh refugee-te ngaihsaktu leh an theihna zawn theuha hmalatu C. Lalrosanga, MP (LS) leh K.Vanlalvena, MP (RS) bakah Minister-te hmalakna hrang hrangte chu lawmawm an tih thu an sawi.
Congress party pawhin thuchhuah siamin Chittagong Hill Tracts, Bangladesh-a Zohnahthlakte, Bangladesh sipai leh Arakan Army helte avanga an in leh lotlan sana dinhmun hlauhawm taka an awm mek hi pawi an tih thu sawiin, “Ei leh in tur nei lo leh riahna tur mumal an neih loh avangin an vakvai leh, an sahimna zawnga an inpui, Mizoram pana an lo kalna kawnga thihna hial an tawkte hi pawi a tiin a tuarpui takzet a ni,” an ti.
MNF leh Congress party hian Thawhtanni khan kum 2023 atana an pisa hawng tura ruahmanna a lo neih lawk tawh chu thulhin Thawhlehnia hawng turin an sawn ve ve a ni.
PC party pawhin Bangladesh atanga Zohnahthlak raltlante thlavang hauha punkhawm buatsaih a ni chu tha an tih thu leh an thlawp tlat thu an sawi a. Myanmar leh Bangladesh atanga Zohnahthlak raltlante a rang thei ang bera official refugee-a pawm an nih ngei theih nan chak taka hma la ngei tawh turin Mizoram sorkar an ngen nawn leh thu thuchhuah an siam a ni.