Keral-a thingpui dawr neitu leh an ei tur zawrhte siamtu ber, chief cook chu amah dawrtuin a thil eiah thil tha lo a awm nia sawia a thihpui avangin man a ni.
Nurse thi ta hian Kottayam district-a a hna thawhna hmun atangin ei tur hi online-in a chah a ni.
Police chuan mi dang 21 pawh he dawra mi thil an ei hnuah an damlo tih an sawi.
Police huan a neitu leh an ei tur chu tualthihna thlengah hian a titua puhin an man phawt a. An kutah awm mekin anmahni chuan engmah an la sawi lo.
He thil thleng hi he state-a ei tur him tawk lo a tam thu leh thingpui dawra himna dan zamte kenkawh that a nih loh thu sawi a tam mek laia thleng a ni.
Kottayam Medical College-a nurse, Rashmi Raj-i hi rice dish leh barbecued chicken a chah a ei hnuah a damloh tak avangin December 30 khan damdawi inah dah a ni a, January 2 khan a thi.
Tual chhung chanchinbute chuan a ruang endiknaah a kawchhunga a taksa peng a chhe nual tih hmuh a nih thu an tar lang.
He thingpui dawra thil siam eitu dang eng emaw zat pawh an damlo ve mek bawk tih an sawi.
Police chuan an chhuinaah nurse hian a thil ei tura thil tha lo awm a thihpui ngei thu an sawi tawh a, he thingpui dawra ei turte chu ‘a him lo hle’ tih an sawi.
Kar hmasa khan Kerala-ah hian ei tur him lo ei avanga thil thleng sawi a lo awm tawh bawk.
Pathanamthitta district-ah sikl pakhata zirlai leh an nu leh pa eng emaw zat chu sikula thiltih khawmnaa an sem ei tur an ei hnuah an damlo.
He district-ah vek hian baptisma chantirna inkhawma ei tur sem ei mi 100 dawn an lo damlo tawh bawk.
Hemi hnuah hian food safety thuneitute chuan an state-a thingpui dawr 500 chuang an fang a, 48 zet chu thianghlim lo taka ei tur an siam avang leh license mumal an neih loh vangin kharsak an ni.