Wales superstar Gareth Bale chuan kum 33 mi niin professional football a chawlhsan thu Thawhtanni zan khan a puang.
UEFA Champions League vawi nga chawi tawh Bale hi Wales chanchin a ram tana khel hnem ber a nih bakah goal khung hnem ber a ni a. Welsh football a player ropui ber nia chhal theih chiang tak a ni.
Spanish club Real Madrid a chhuahsan hnuah nikum June thla khan Major League Soccer club Los Angeles FC a zawm a. An hnenah hian season chanve chauh hmang mahse season hlawhtling a hmanpui.
Player ropui Bale
Cardiff a piang Bale hian Southampton academy atangin professional football bul a tan a. A hunlaia khawvela footballer manto ber ni turin football zinkawng a zawh.
Saints tan rawlthar beiseiawm niin kum 2007 khan Tottenham chu Pound maktaduai 10 in a zawm a. Spurs-ah hian che tha turin nghah hlek ngai mahse an player tha ber a ni thuai a. Tottenham player of the year tum hnih ngawt niin UEFA Champions League an khelh theih chhan a ni a. Inter Milan lakah San Siro a a hattrick siam chuan a vawrh lar.
September 2013 khan Real Madrid in Pound maktaduai 80 in an lei a. Spain khawpuiah hian league title vawi thum a chawi bawk a. Ani aia British player Spain a che tha an awm lo.
Hliamin a tihbuai leh thin avangin Real a a huntawpah a langsar chiam lova, a contract neihlai hmang zovin USA lam a pan ta a ni.
“Uluk taka ngaihtuahna ka hman hnuah club leh ram tana football khelh ka chawlhsan thu ka puang.”
“Ka infiamna ngainat ngeiah ka suangtuahna tam tak a tak ram ka chantir thei hi vannei ka inti hle. Ka nun a ka hriat reng tawh tur thil tam tak ka tawng a ni.” tiin a sawi.