India-a thlawhna lam thuneitute chuan airline pakhatin Karnataka thlawhna tumhmuna a passenger-te hnutchhiaha a thlawh chhuah chungchang a chhui mek.
Tun hmaa Go Air tih thin, tuna Go First tih tak thlawhna hian Bengaluru tumhmunah passenger 50 chuang zet thlawhnaa an luh hma, bus-a an la awm laiin a chhuahsan a ni.
Zin mite hian an bungrua an endik vel mek a, boarding pass pawh an keng vek tawh bawk nia sawi a ni.
Airline chuan he thil thleng hi an chhui zui nghal thu an sawi a. Go First hian Twiiter-a he thil thleng sawiseltu passenger-te hnenah ngaihdam an dil bawk.
Bengaluru-Delhi thlawhna hi Thawhtanni zing dar 6:20-a thlawk chhuak niin passenger tam tak chu thlawhna panna bus-ah an la awm hlawm a ni.
“Ground staff-in thlawhna a thlawh chhuah tawh leh tawh loh a en a, a lo awm tawh lo va, a lo kir leh dawn tih a sawi zui,” tiin passenger pakhat, Sumit Kumar chuan news channel NDTV hnenah a sawi.
Thlawhnain a thlawhsan hnuah hian passenger-te thinrim chuan an lungawi loh thu leh an thil tawn chu Twitter-ah dah chhuak nghalin Go First chu an ‘fimkhur lo’ an ti.
Passenger-te hian airline hi an thil tar lanah hian union aviation minister leh prime minister pisa pawh an an tilang (tag) tel zel bawk.
Go First pawhin chhang letin, “Hetiang thil a thleng hi pawi kan ti tak zet,” an ti.
Airline aiawh chuan a hnuah Deccan Herald chanchinbu hnenah thil thleng chu ‘chhui’ a nih thu a sawi a, a bak a sawi zui duh lo thung.
News agency ANI chuan passenger 53 chu airline dang thlawhnaa an zin dan tur ngaihtuahsakin an thlawk leh a, pahnih erawh chuan an ticket an kir niin a tar lang.
India-a thlawhna thununtu, Directorate General of Civil Aviation chuan ‘airline hnen atangin thil thlen dan kan ngaichang mek a, hmalak zui zel a ni ang’ an tih thu thuneitu sang pakhat chuan news agency PTI a hrilh.
Tun tuma Go First thlawhnaa thil thleng hi tun hnaia India-a airline-te laka mipui lungawi lohna thleng pahnihna a n.
Kar hmasa maiah khan Air India thlawhna pakhata chuang ve mipa, zu rui takin a chuanpui pitar a zun khum chungchanga a khalhtu leh thawktu dangten an hmachhawn dan chuan sawi a hlawh hle tawh bawk.
Zu rui hian a chuanpui pitar hi a zun khum bakah hnawksak takin a awm a, thawktute hian senghawia ching fel mai lovin rei tak hnawksakin an awmtir a, dem an hlawh phah hle.