Aizawl : YMA, Ngentiang branch-in an branch kumpuan atana an thlan ‘Khawtlang nun chawisan’ chu nimin khan bialtu MLA, Minister Er. Lalrinawma’n a hawng.
Ministr Er. Lalrinawma chuan Ngentiang branch YMA-in anmahni puala kumpuan an nei chu lawmawm a tih thu sawiin, YMA chu pawl lian leh thianghlim, hnamdangte pawhin an hriatlar a nih thu leh khawtlang inrelbawlnaa dinhmun pawimawh tak luahtu a nih thu a sawi a. Khawngtlang nun chawisan kawnga pawimawhber pakhat chu mitinte nungchangthatna a nih thu a sawi.
Khua leh tui tha ni tura inpekna, vantlang thil te mahni ta ang taka enkawl thiamnate, nungcha leh ramngaw humhalh that te, Zonunzemawi tinreng rinawmna, tlawmngaihna leh aia upa zahna chawinung thiam zel te a pawimawh hle dawn tih Lalrinawma chuan a sawi a. “Kan hnam ziarang leh tawngte chu khawiahmah zahpui lova, a chawi lartu nih zel zawk te a tha hle a ni” a ti.
Lalrinawma chuan zirna leh hriselna chu hmasawnna bulthut a ni tih hriatreng a pawimawh thu sawiin, taksa hrisel tak nei turin nunkawng thianghlim zawh thiam a tul thu a sawi a. Ram, chhungkua leh khawtlang tana thawkchhuaktu ni thei tura zirna leh hriatna lama intahhriam sauh sauh a pawimawh thu a sawi bawk.