Aizawl: Thawhlehni khan MNF party chuan kum 2023 atana Mizo Hnam Run hawnna leh chhung inkhawm an nei. He huna thusawitu, MNF Adviser Lalruatkima chuan Bangladesh Zohnahthlak raltlante chu theihtawp chhuahin sorkarin a buaipui mek niin a sawi.
Lalruatkima hian tun laia hmun hrang hrang Zofate harsatna tawh dan leh Mizoram sorkar hmalaknate sawiin, “Bangladesh atanga rawn raltlan (refugee)-te buaipui chu thil buaithlak tak, politics khelhna atana hman chi pawh a ni chiah lo a. A chhan chu United Nation High Commissioner for Refugees Convention 1951 leh hemi behchhana Protocol 1967 a siamah India hi a signatory ram zingah a tel ve loh avangin hmalak a har zual a ni,” a ti.
MNF adviser hian Bangladesh Zohnahthlak raltlante tawrhna leh manganna chu sorkar ang pawha an hriatpui thu leh Mizoram sorkar chuan theihtawp chhuaha a buaipui zel tur thu a sawi a. Chutih laiin duh ang leh ruahman ang diak diaka thil a kal chak thei rih lo erawh pawi a tih thu a sawi.
“Buaina tawkte hi kan hnampui an nih miau vangin Mizo tlawmngaihna leh thian chhan thih ngam rilru kha kan sorkar, Pu Zoramthanga kaihhruai hi chuan a kalpui zel dawn a,” tia sawiin, a tul a nih chuan sorkar laipui an nawr zel tur thu leh a rem a nih chuan Bangladesh sorkarte pawh an la dawr zel dawn niin Lalruatkima hian a sawi bawk.
Nimina chhung inkhawm hi Lalthlengliana, MNF Vice President-in a kaihruai a, martarte sunna leh ram tana tawngtai rualna neih niin MNF Treasurer K.Vanlalauva chuan kum 2023 MNF Calendar a tlangzarh a ni.
MNF party thuchhuah tar lan danin tun dinhmunah raltlante hi Parva III-ah mi 212 awmin, in 34 saksak an ni a. Vathuampuiah mi 34 awmin Primary School leh mi mal inah te dah an ni a. Mautlangah mi 46 dah niin Primary school leh Middle school-ah dah an ni. Chamdur ‘P’-ah mi 44 awm tawhin camp pahnih, pindan 14 awm siamsak an ni a. Hmawngbu-ah mi 52 lut tawhin Community Hall-ah awmkhawm lailawktir an ni a. An chenna tur sak tan mek a ni.