Nikuma tui lian rapthlak tak an tawrh avanga puih nan khawvel ram hrang hrangte chuan Pakistan hnenah $ tluklehdingawn 9 chuang zet pek an tiam.
Pakistan hian khuarel chhiatna lian tak an tawrh avanga ding chhuak leh tur chuan $ tluklehdingawn 16.3 zet an mamawh tih an sawi a, a zahve aia tam hret an dawng dawn a ni.
Nikuma tui lian an tawrhah khan mi 1,700 vel an thi a, mi maktaduai riat vel vahvaih phahin in leh lo tam ta a chhia a ni.
Puihna tura intiamna a awm mek laiin Pakistan hian an ram sum leh pai harsatna avanga tal chhuak tura chhanchhuahna (international bailout) dapin inbiakna an kalpui mek zel.
“Vawiin hi kan tan chuan beiseina ropui tak min pe lehtu a ni,” tiin Minister of State for Foreign Affairs Hina Rabbani Khar chuan Geneva-a United Nations (UN) kaihhruaia climate conference neih mekah a sawi.
“Khawvelin min duhpui chu kan hria a, khawvel hi khuarel chhiatna lian tak paltlangtute tan a ding zel dawn a ni,” tiin Khar-i chuan a sawi bawk.
Islamic Development Bank, World Bank leh Saudi Arabia te chu puihna an dawn tura thawh hnem zual tur an ni.
European Union, United States, China leh France ramte pawhin puihna an pek dawn thu an puang bawk.
UN Secretary General Antonio Guterres chuan Pakistan tan hian ‘sik leh sa avanga chhiatna rapthlak tak’ an tawrhna laka tung ding leh turin puihna tam tak an mamawh tih a sawi hnuah ram dangte hian an puih tur thu hi an tiam hlawm a ni.
Conference karah hian Pakistan chuan International Monetary Fund (IMF)-in an ram eibar dinhmun chhe lutuk atanga khai chhuak tura puihna tur pek a tum chu tihfel tumin a dawr chhunzawm zel bawk a. IMF hian $ tluklehdingawn 1.1-a puih a lo tiam tawh a, nikum November-a inpek turin a lo ti tawh.