Aizawl: Nimin January ni 11 kha Welsh missionary pahnih Pu Buanga (Rev J.H. Lorrain) leh Sap Upa (Rev F.W. Savidge) ten chanchin tha hril tura Mizo leilung an luh champha vawi 128-na a ni a, Baptist kohhranten hmun hrang hrangah an hmang.
Baptist Church of Mizoram (BCM) chuan Missionary Day hi ropui leh urhsun takin an lawm a, chawhmaah sermon inkhawm neih a ni a, thupui ‘Chanchin Tha hi hril rawh u’ tih thu hmangin thuchah ngaihthlak a ni a. Chawhnuah Pathian faka zaikhawmna hun siamin, tlai lamah Missionary Day lawmna ruai kilho a. Zan inkhawm pawh he ni pual progamme hman chhunzawm a ni.
BCM Headquarter Serkawnah chuan chawhma inkhawm hi BCM Mission Deptt Director Rev Lalremsiama Ralte chuan thu a sawi a. Missionary Day lawm nan ruai theh a ni a, photo booth siamin Sap Upa leh Pu Buanga thlalak mihring tiata siam chu thlalakpui an tam hle. Pathianni ang maiin dawr inhawng a tam lo va, mihring phur chi lirthei tlan a tlem hle a ni.
Zarkawt Presbyterian Kohhran chuan a duh a piang tel theih turin nimin zing khan missionary-te hriatrengna Lungdawhah Missionary Day pualin inkhawm an buatsaih a, Rev. F.Lalhmingthanga, Dawrpui Bial Pastor-in thu chah a sawi a, tawngtai rual a ni a, Zarkawt Kohhran zaipawlin Halleluia Chorus an sa a, inkhawm banah Kohhran Pavalai buatsaihin thingpui ruai kilho a ni.