Aizawl : Lawngtlai Bawrhsap, Chakma Autonomous District Council (CADC) Caretaker ni bawk Amol Srivastava’n nimin khan CADC hmunpui Chawngte a tlawh a. Official-te kawmin, hmun pawimawh leh hna hrang hrang a enfiah bawk.
Lawngtlai Bawrhsap chuan CADC-a Head of department te chu meeting neihpuiin, tlawmngai pawl hrang hrang – Young Chakma Association, Chakma Mahila Samiti, Mizoram Chakma Students’ Union leh pawl dangte pawh a kawm a. Pawl hrang hrang aiawhte hian kumin April-a neih tura beisei CADC inthlanin Chakma ten kum tin April thlaa an hman ṭhin an hnam leh sakhaw kut Bizu a tihbuai loh nan Bizu hmaa inthlan buatsaih a nih theihna tura hmala turin an lo ngen.
Bawrhsap chuan CA- DC New Secretariat building, Govt Kamalanagar College, Ekalavya Model Residential School leh hmun pawimawh dangte pawh a tlawh a. Chawngte Sub-Divisional Officer (Civil) Dr Manesia Khaimeichho, CADC-a Education Officer (P/S) Gana Chandra Chakma, CADC-a DTO & OSD to Caretaker Sadananda Chakma leh official dang ten an ṭawiawm.
Lawngtlai Bawrhsap chuan EMRS District Level Committee Chairman a nih angin Ekalavya Model Residential School (EMRS), Dulubonya, Kamalanagar pawh tlawhin, building thar sak hna kal mek a enfiah a. EMRS building thar sak mekah tuilakna leh Chawngte aṭanga a panna kawng siam hmabak te a enfiah.
Govt Kamalanagar HSS leh Govt Kamalanagar College te pawh tlawhin, a panna kawng thawmṭhat dan tur a enfiah a. Kum 5 liam ta aṭanga NABARD sum Rs. vaibelchhe 8 senga sak mek, Udalthana-a CADC New Secretariat building pawh tlawhin, a enfiah a. CADC PWD-a thawktu ten an hnathawh dinhmun an lo hrilhfiah.
Rural Drinking Water Supply Scheme hnuaia Rs. vaibelchhe 9 senga hnathawh mek Basantasora Duor-a Chawngte Rural Drinking Water Supply Project pawh a tlawh a. Kamalanagar Public School leh Govt Comprehensive Middle School, Kamalanagar te pawh a tlawh bawk.