United States-a California state chuan chawlhkar thum vel chhung thlipui leh ruah an tawrhah tuipui kama dollar maktaduai tel man chu thlipuiin a nuai chhia a, lei tlahniamin lirthei a pilpui a, mi tam tak an thi tawh bawk.
December-a chawlh hunpui an hman atang tawha ruah leh thlipui thawk inzawm zat hian a state-a hmun lar, chhim lam vaukam a hrut na hle a. Kawngpui a chhia a, thung a tlu a, lei a min nasa hle bawk.
Governor Gavin Newsom chuan Thawhlehni zan (India-a Nilaini tuk) khan khaw awm dan suakbak vanga chhiatna thleng kaihhnawihah mi 17 vel an thi tawh tih a sawi.
National Weather Service (NWS) chuan Australia rama mihring cheng zat zet, mi maktaduai 22 vel chu tui lian thlen mai theihna karah an awm mek tih a sawi a, mi sang tel hmun himah an insawn chhuak tawh bawk.
San Francisco chhim lam, Santa Cruz County-a cheng, Rachel Oliveria chuan lui tui chim chin sang mek zel leh an in a chim lai chu tihtheih dang nei lova an thlir ringawt thu NBC hnenah a sawi.
“Rang takin a lo thleng a ni mai,” a ti a. “Minute reilo te chhungin kawtthler tin atangin kan kawtah tui a lo luang khawm a, rang takin a chim vek,” a ti.
National Oceanic & Atmospheric Administration (NOAA)-a climate services programme manager, Andrea Blair-i chuan California hian thlipui leh ruah dawn an la hmabak niin a sawi a. Tun kar tawp leh karleh lam pawh a la thawk dawn niin a sawi.
Tun tuma mi erawh kar tawp liam ta leh Thawhtannia an tawrh aiin a thawk nep deuh dawn niin a sawi lawk a; mahse, chhiatna chu an tuar rei deuh rih dawn niin a sawi.