Premier League club Chelsea in Atletico Madrid forward Joao Felix chu tun season tawp thleng atan an hawh a. Euro maktaduai 11 hawh man an chawi ang.
Kum 23 mi hi Arsenal leh Manchester United nen pawh sawizawm an ni a, mahse anni lam hian ngaihven thui lovin Chelsea zawm a thlang ta zawk.
Portugal international hian Blues a zawm hma hian Atletico Madrid hnena contract a neih chu kum khat a ziah belh a, June 2027 thleng an hnenah contract a nei.
“Chelsea hi khawvela team tha berte zing ami an ni a, an tum an hlen theihna turin he team hi ka puih theih ngei ka inbeisei.”
“Helai hmuna ka lo kal thei hi ka lawm hle a, Stamford Bridge a ka inkhel tur hian min ti phur hle.” tiin Felix chuan a sawi.
Atletico Madrid in Felix hi khawvela player manto ber pangana ni turin kum 2019 khan kum 19 mi lek a nihlaiin Pound maktaduai 113 in an la a. An tan inelna hrang hrangah vawi 131 inkhel tawhin goal 34 a khung a, midang khung tur vawi 18 a siamsak tawh.
Tun World Cup ah khan Portugal tlarhma luahin match nga a khelhah goal khat a khung.
Blues hian tun thlasik bazarah hian player pali an lakluhna niin Benoit Badiashile, David Datro Fofana leh Andrey Santos te an lalut fel tawh.