Chief Minister Zoramthanga ruahmannain nimin khan Minister Lalruatkima, Minister of State TJ Lalnuntluanga, MLA K. Laldawngliana, MLA leh MNF Vice President Vanlalzawma ten Parva III an tlawh a, Bangladesh buaina avanga Zohnahthlak raltlan awmte dinhmun an enfiah.
Parva III khuaah hian minister leh khawtlang hruaitute an inkawm a, hmalak zel dan turte an sawiho.
Khawtlang hruaituten mamawh an lo sawite pawh a tul anga sorkarin a ngaihtuah zel tur thu an sawi.
Minister-te hian an thil hmuh dan leh a tul angte chu Aizawla sorkar hotute, a bikin chief minister an sawipui tur thu leh, ruahmanna a rang thei ang bera siam zel a nih tur thu an sawi bawk.
Bangladesh Zohnahthlak raltlante chu an harsatna awm apiang khawtlang hruaitute leh tlawmngai pawlte hriattir zel tur leh a tul dan anga SDO (Civil) Chawngte hnenah thlen zel turin an chah a ni.
He hunah hian minister-te hian raltlante tana hmalakna kal mek, tui khawlna PHE lamin an buatsaih leh thil tul dangte pawh an en nghal a. Sorkar aiawha official hrang hrang awmte nen pawh inkhawmna hun an nei bawk.
Ram hruaitute hian raltlante tan thilpek thahnem tak, sumfai leh a bungruate an pe nghal bawk a ni.