Greece ram lal hnuhnung ber, Constantine II chu kum 82 mi niin a thi tih a doctor-in a puang.
Constantine II hi Thawhlehni zan khan Athens khawpuia mi mal damdawi in pakhata intensive care unit-ah a thi niin damdawi ina thawkten an sawi tih Associated Press chuan a tar lang.
Greek ram chanchina boruak inlumlet a nasat vanglai tak, kum 1964 khan Constantine II hian lalthutthleng a luah tan a. A hnu kum thum lekah sipaite an hek zui ta nghe nghe.
Sipai helte a hneh zawh loh avangin ram danga a tlanchhiat a ngai hial a, kum 1973 khan an rama lal neih pawh tihtawp zui a ni.
Hemi hnuah hian Greek khua leh tui a nihna pawh hlihsak zui a ni.
Denmark ram lal fanu, Princess Anne-Marie nen inneiin fa panga an nei.
Kum 2002 khan amah leh a chhungte dang tam tak chuan an rama an thil neih (property) thin atangin zangnadawmna thahnem tak an dawng.
Constantine II hi lawng khalhtu, sailor hriat hlawh tak niin 1960 Rome Olympic Games-ah khan team event-a gold medal dawng zingah a tel ve nghe nghe.
A hnuah pawh International Olympic Committee-ah pawh a tel zui ve reng a ni.