- TC Lalremsiama
Kawng hrang hranga Mizoram leh Mizo hnam damna leh hmasâwn nân hian mi mal, chhûngkua, khawtlâng mipui, Kohhran, kut hnathawk, sumdâwng, tlâwmngai pawl member-te leh hruaitu, sawrkâr hnathawk, ram hruaitu leh politics-a inhmangte hian kan tihfuh zat loh leh kan tihsual thinte hnuchhawna a tha zâwk ngaihtuah chhuah zêl hi a pawimawh thîn a. Chuti ang kan thiltih dik loh leh tihfuh lohte hnuchhawna kawng dik leh tha zâwk kan zawh theih chuan ram leh hnam nunphung a inthlâk chhoin danglamna a thlen a; ram leh hnam damna leh hmasâwnna tha zâwk leh ngêlnghet a awm phah thei a, chumi atân chuan ‘kum thar 2023 thupui’ vuahin kan ngaihtuah tûr thenkhatte tâwi tê têin heti ang hian i han târ lang teh ang:
1) Tualzâl nun (social life) leh hnam nunphung (culture, tradition & practice and custom): Kan khawsak honaah ‘Zonun mawi’ kan sawi thîn a, kan chhuang êm êm a; tûnah hian chhuan tûra kan tualzâl nuna bet hi kan la nei rêng em le? Tlâwmngaihna leh aia upa zah leh thuâwih te hi Mizoram naupang leh thalaite bâkah puitlingte pawh hian kan hriat thara nunphung pângngaia kan neih lêt leh hlawm hi a ngai hlein a hriat a, chhûngkua atanga kan inzirtîr thar zêl a tha hle.
Tûna Mizo nunphunga tlâwmngaihna kan tih hi ‘tlângzarh tlâwmngaihna, phût nei tlâwmngaihna, mi lian leh neinung zahpah tlâwmngaihna leh tha ba sût tlâwmngaihna’ ang dâwn dâwn tein a ngaih theih ta em? Ram dang leh hnam dang chu sawi loh, Mizote pawhin kan pi pu chenah aia upa zah leh thuâwih te hi nun hona tha leh Mizo hnam dam khawchhuah nâna kan lo hman chhoh thin a nih vei nên, tûnah chuan thangtharte chuan ‘zah tlâk chauh zâha an thu âwih tûr’ an ti ta lekfang a; an intifelin an chapo si a, aia upate zîngah tu mah zah tlâk tling khawp an hmu zo si lo a, an aia upate zah lotute ngei ngei pawh anmahni’n bûk lung an hman ngei mai hmangin naupang zâwkten an rawn bûk ve zêl si a, a zah tlâk azâwng chuan bûk tham an lo ni bîk hauh bawk si lo a, Mizo nunphung a chîrî phah zo ta a tih theih hial âwm asin. Mizo mipui nâwlpuiin kan luh chhuah ve social media – WhatsApp, Facebook, Instagram, twitter, etc. te hi han thlîr mah ila, ‘Mizo hi an lo va sualin an lo va’n zak thei lo tak êm!’ tih mai tûr khawpin an awm ta a; tû mah zahpah an nei hlawm lo a, an hmachhawnate kha aia upa an nih leh nih loh lam pawh ngaihtuah hauh loin naupang tê tê pawhin an aia upa fê pawh hnial pâwng pâwngin an dak khum zawt zawt a, Mizo nih ve pawh hi a lo zahthlâk phah thei dâwn hial mai thîn. ‘Aia upate hi kan aia upa an nih avânga zaha an thu âwih mai tûr kan ni’ tih thuthlung vuanin Mizo hi i harh thar teh ang u khai.
Lianchhiari quadrian (6×4+abaa):
AIA UPA ZAH LEH THUÂWIH
Dâwntuai leh naunâwn vâl,
Kan pâu âm lua thîn e;
Upa zah kan bosal,
Zonun mâwi a thâm ral.
Zonun mâwi kan hai zo,
Âwih tlâk awm lo mah se;
Û zâwk an âwih mai fo,
Tûnah chuan kawng kan bo.
Hmatiang sâwn thangthar chuan,
Zah tlâk zah tûr an ti;
Kei chuan hei hi ka vuăn,
Upa – zah tûra duăn.
Tin, ram hmasâwn leh changkâng kan tih, mihring pawh zalên lutukte nunphung chi tinin min rûn nasa tawh hle a; Mizorama Mizo hnam tâna tha ber kum hlun Mizo hnam nunphung, chîn dân leh Mizo hnam dân ngaih hlut leh zaha ngaih pawimawhna kan tlachham telh telh a, a tlâna tlânsan daih te pawh an awm hial tawh ang em tia ngaihtuah rum rum theih pawh a ni hial âwm e. Hetih lai hian Mizo hnam nunphung, chîn dân leh Mizo hnam dân (culture, tradition & practice and custom) hre lo leh ngaihsak eih lo thangtharte zîngah an thahnem ta hlein a hriat a; chhûngkua atanga inzirtîr ve ngai lêm lo pawh an kat nuk hial tawh mai thei nghê nghê bawk. Mizoramah Mizo hnam tân chuan Mizo hnam nunphung, chîn dân leh Mizo hnam dân hi a tha ber leh a tlo ber tûr chu a ni a; chu chu kan vawn nuna kan hman tangkai loh chuan kan tân phêngphehlepa khua a tlai thuai thei tawh hial ang. Hei hi sâp ram a ni lo a, Korea a ni lo; Mizoram, Mizo hnam chênna a ni a, Mizo hnam nunphung, chîn dân leh Mizo hnam dânin awmzia a neihna tûr ram chu a ni.
2) Ei leh bâr thawh chhuahna (economics): Kut hnathawk, Kohhran leh pâwl hruaitu, sumdâwng, sawrkâr hnathawk, ram hruaitu, political party worker, contractor, etc. tinin ei leh bâr thawh chhuahnaah te, sum thawh chhuahna, in leh lo leh huan lo ram dinna kawngah te hian hlemhlêtna hnuchhawna dik taka mahni kutkawih leh thawhchhuah, mahni hlawh leh mahni tá dik tak chauh kan seng khâwm a hun ta. Heti zâwnga ‘Mizo kristian milem bia (mi duhâm)-te’ hi kan kal vat loh chuan, lum/vâwt làw làw kan chheh vêla Budhist, Muslim leh Hindu rualho mawng phé pawh hmu hman loin kan awm reng mai dâwn a ni.
3) Ram rorêlna leh inrêlbâwlna (politics): Ram rorêlna leh inrêlbâwlna (politics) thilah hian ram hruaitute leh political party-a inhmangten mi dangte thiltih tha inpawmpuia intâwiâwm tawn theih kan mamawh zêl dâwn a; thu belhchian dâwl lo leh thu dik chanvê chu sawi loh, dâwta inpuha insawi chhiat tawn chiam chiam hnuchhawna dâwt sawi loh leh thutiamte hlen chhuah hrâm hrâm theih hi a pawimawh thîn a. Sawrkâr hotu leh ram hruaitu, Kohhran, pâwl (NGO) leh mipui hian ram rorêlna leh inrêlbâwlnaah thawh hona tha kan mamawh êm êm rualin, mi dangte hi chu engti hawi zâwng pawhin lo chiau ve chiam chiam thîn mah ila, sawrkâr hotu leh ram hruaitute chuan mahni ‘principle & policy’ tinghînga tidanglam tûr khawpa mi dang ngaih pawimawh loh hun neih a tûl châng a tam thei ang a; chuti ang taka kan ram leh hnam hmasâwn nâna mipuiin sawrkâr hotu leh ram hruaitu atâna kan thlan tlin chhan pawh an ni rêng a, sawrkâr hotu leh ram hruaitu khalh ngîl pawh mipui lam mawhphurhna a nih rualin, sawrkâr hotu leh kan ram hruaituten ram leh hnam tâna an thil tumte zalên taka tihlawhtling thei tûra mipuiin tibuai lova kan tâwiâwm that hi a pawimawh fo a ni.
4) Kohhran/Sakhuana: Mizo kristiante hi ‘milem bia (mi duhâm)’ tia sawi theih mai âwma mawi kan nih chhan hi a awm nual mai thei; dikna, rinawmna leh hlemhlêtna chungchâng ringawtah pawh hian kan chheh vêla Budhist, Muslim leh Hindu te’n min entawn tûr ni âwm tak kan nih vei nên, Hindu-pahoin dik tak leh rinawm taka thiltihna tûr leh hlemhlêtna ûm bona tûr ruahmanna an siamte pawh kan zâwmin kan zui tha mûmal thei meuh lo nia ngaih châng te pawh a awm fo ang em? Mi mal tâna a tûlna chu sawi loh, kan ram leh hnam dam nân Mizo kristiante hian Kohhran mi kan nihna hi khawi kipah pawh kan ni tin nunah hian a lem ni lo, takna, mal tlat pawha kristianna nunpui tlat leh daih rei nun hi kan vawna kan chhawm nun that hi a ngai tak zet a ni. “Tihnuam tak leh thu awih taka in awm chuan, in rama thil thate hi in ei ang; nimahsela, in duh lohva in hel chuan, khandaihin a ei zo vang che u.” -Isaia 1:19-20
5) Mizo tawng leh Mizo thuhlafùn (Language and literature): Mizo tawnga tawngkauchheh leh thumal (vocabulary) kan neih sa vawn him leh kan neih that sa ang taka hman zêl hi Mizo tawng hmasâwn nân leh Mizo tawng a rîral loha kan vawn him kan vawn nun theih nân te a tûl tak zet a. Global village-ah ram dang leh hnam dang tawng bâkah hmasâwnna hrang hrangin min chiahpiah hneh chho zêl a; hei vâng hian Mizo tawnga a sawina kan la neih ngai loh, kan sawi vea kan hman ve ngei ngei ngai si a tam êm êm a, kan tawng neih sa tichingpen si loa kan hman dân tûr kan chher thar thiam a tûl hle bawk. Tin, social media-in tute mai pawh hi min chiah hneh êm avângin mi nâwlpuiin lehkhabu chhiar kan thlahthlam a, mahni chhiar tûra lehkhabu lei tlauh tlauh thîn phei chu an thahnem tawh lo mai thei; internet atangin thu tha leh tangkai tak tak kan hre theiin hman tangkai tûr pawh kan la khâwm thei tho nâin, lehkhabu ngei chhiar manhlâ dân leh a tangkaina chik ngun leh hlawm ila, lehkhabu chhiar i uar thar leh bawk ang u.
ZORAM TÂN ‘NANG’
Tûnah ram lo thleng tûr chu kan pan dâwn;
Mahse, min zâwt, ‘Khawiah nge i ram?’
Ka ram a awm lo sâw râlah sâwn,
Ka lairil a ni, âw, nang hi Zoram;
A ngai chuang nêm le ram thar din,
Ram neitu kan indin thar chuan a tâwk thîn.
Khai le, râlthuam tha chu kan lek chhuak,
Hmangaih duhsakna, mi dik huaisen,
Taimâk leh rinawmnain min hmuak,
Duhâm leh hlemhlêtna bawlhhlawh bâwm nên;
Zo nun mawi iptepui ak r’u,
Phei lai vâwra hmatiang sâwnin zâm hlek s’u.
Ti rawh le, tûnah thawk tan nghâl rawh,
Mi dang mi dang tû mah sawi loin,
‘Kei ka hmunah,’ tih zâi kan sa tawh;
ZORAM TÂN ‘NANG’ hi i pawimawh ber asin,
‘Ti khân i thawh kawr chu ha la’ng,
thahnemngaiin tuan zai chu rêl dûn ang hmiang.
-Ngaihlungdum Prose & Poetry Institute