Manchester United in English Football League Cup semi-final an lut a. An mikhual Charlton Athletic lakah goal thum khungin 3-0 in hnehna an chang.
Thawhlehni zana Old Trafford a inkhelah United forward che tha tak mai Marcus Rashford bawk inkhel a zawh meuh chuan a langsar leh a. Huntawp dawnah goal hnih a khung. English forward hian tun season-ah goal 15 a khung tawh.
United an che tha tluang
United in first half-ah minute 21-naah goal an khung a. Brazilian winger Antony-a’n dinglam sir atang ball changin a ke veilamin mawi takin a pet kual lut.
Nimahsela League One a khel Charlton an nem bik lo. United chu goal khung belh thei lovin an siam a, player nei tha zawk an ni chungin United in an khingpuite an dahtha mai thei lo.
Second half-ah Rashford dahluh a ni a, awmzia nei nghal mai lo mahse United in minute 90-na leh 94-naah goal an khung. A hmawrbawktu Rashford ve ve a ni a, goal luhnaah Casemiro passing tha a pawimawh.
United hi a zawnin vawi riat an chak tawh a. League Cup bikah season ruk chhunga vawi thum semi-final an luhna a ni.
Manchester United manager Erik ten Hag chuan inkhel zawhah, “A tir darkar chanve chhung kan khelh dan a lungawithlak a, mahse goal hma a kan hriam tawk lo erawh ka lawm lo.”
“Semi-final luh kan duh a, kan tum kan hlen. Kha aia hma khan inkhel dahtha tur kan ni a, mahse a pawimawh ber result kan neih avangin team in fak an phu.” a ti.
Goal hnih khung Rashford fakin, “Penalty area chhungah one-on-one remchang a neih chuan a khung zel a, hei hi tunhnaiah a ti fo. A rilru a pek a, taima taka a thawh chhunzawm reng chuan goal a khung reng ang.” a ti bawk.
Inkhel dangah Newcastle United in Leicester City an hneh a. St. James’ Park a inkhelah hian second half-ah Magpies tan Dan Burn leh Joelinton ten goal an khung.