Myanmar indo thlawhnaten Thawhlehni leh Nilaini khan bomb hmangin Chin National Army (CNA) hmunpui, Camp Victoria an bei a, he inbeihna avanga hliam tuarte chu Mizoram lamah phurh thlak an ni.
Farkawn leh Vaphai khawtlang hruaitute hnen atanga thudawn danin, Thawhlehni chawhnu dar 3:33 vel khan Myanmar sipai indo thlawhnate hian Farkawn khua atanga hnai te, Tiau lui kama awm, Camp Victoria chu beiin bomb panga vel an thlak a, CNA sipai panga an thi.
A sawi dan chuan bomb thlak avang hian hliam an awm lo va. Camp Victoria chhunga an damdawi ina enkawl lai mi 20 vel erawh chu bomb hmanga beih an nih hnu hian chhuahtirin an khaw lam theuhah an haw a. An zinga damlo pakhat erawh chu a nat deuh avangin Aizawl lama enkawl tura phurh thlak a nih thu a sawi.
Thudawn danin Myanmar indo thlawhnate hian Tiau lui leh lam India ram chhung pawh an kap tel a, bomb puak vawi thumna hi India ram lam tiaupho-ah a ni a, boruakah pawh India- ram an rawn thlawk lut niin an sawi a. Tiau kam, India- lama awm, balu phur motor, MZ-01-J 6847 TC Hmangaihsanga motor chu a bomb siperin, a darthlalang a tichhe nasa hle a, India lamah hian an bomb themte pawh an chhar hlawm a ni.
Nimin tlai khan Myanmar indo thlawhnate hian CNA awmna bawr vel hi an bei leh a, he inbeihnaah hian thi leh hliam an awm leh awm lohte he thu buatsaih lai hian hriat a ni lo a, chutihrual chuan camp chhung, family lane lam a kang nasa hle nia hriat a ni.
Myanmar sipaite chetna hi Farkawn khua atangin a hmuh chian theih hle a, mipuite pawhin inbeihna ngaihven hian an thlir thup a, mipui a tiralti hle nia thudawn a ni.
Myanmar sipaiin jet fighter panga hmanga an beihna avanga lungawi lohna lantir nan nimin zing khan Chin state khawpui, Hakha-ah dawr leh sumdawnna hmun zawng zawng khar vek a ni.
CNA thupuangtu, Salai Htetni chuan Myanmar sipai sorkar nena kum 2023 tawp thlenga inkahhai an puan bawhchhiaa Myanmar sipaiin an bei chu mak an tih thu leh hriatthiam har an tih thu a sawi a. Myanmar sipai chetna chu na taka chhan let an tum tih a sawi.
Thudawnnain a sawi danin, Myanmar sipai leh an ram chhunga hel pawl hrang hrangte chuan kum 2015 khan ram pumah kum 2023 tawp thleng inkahhai puangin, Nationwide Ceasefire Agreement (NCA) ziakin an inrem a. He inremnaah hian CNA/CNF te pawh an tel a ni.