France khawpui, Paris-a international railway station lun tak, Gare du Nord-a mi pakhatin chemtea mi a beih chiamnaah mi parukin hliam an tuar a, an zinga pakhat chu a dinhmun a tha vak lo.
Interior Minister Gerald Darmanin chuan mi beitu mipa hi a duty hun zova haw tum police officer pahnihin dangin a man tih a sawi.
Mi vittua puh hi vawi thum kah a ni a, hliam na tak tuar chungin damdawi inah lak a ni.
Thuneitute chuan hetianga a chet mai chhan hi an chhui zui mek.
Mi beihna thlen hun hi an ram sanaa Nilaini zing dar 6:42 (India-a chawhma dar 11:12) niin minute khat vel chhung chauh a che hman tihin officer pahnih hian an titawp hman a ni.
Darmanin-a chuan police-in huai leh awmze nei taka an beihna fakin nunna tam tak an chhan thu a sawi.
Hliam tuar zinga pakhat chu ramri vengtu sipai a nih thu a sawi bawk.
Police chuan mi vittua puh hi a hming an la puang lo va, damdawi ina hruai a nih lai hian tunge a nih hriat theihna tur lehkha engmah ah a nei lo.
Darmanin chuan thil thleng hi firfiaka chetna lam chhuitute ni lovin, pawikhawihna thleng pangngaite chhui tura tih a nih thu a sawi.
Mi beihna thleng avang hian zing lama station lun lai tak ni mah se rel chhuak leh lut tur tam tak tihkhawtlai a ni a. Thil thlenna lai bik chu puan var hlai taka zar hliah a ni.
Paris-a Gare du Nord station hi Europe khawmualpuia rel station lun ber pakhat niin ni tin mi 7,00,000 vel rel an chuan leh chhukna hmun a ni.