United States President Joe Biden chuan Myanmar-a mipui sorkar paih thlaa thuneihna chelh mektu sipai hotute chu US-in a hrek dawn tih a puang a, mipui thlan hruaitute hnenah thuneihna pe kir turin a ti bawk.
White House atanga television-a thuchah a sawiah Biden-a chuan sipaiten mipui thlan sorkar an hnehchhuh leh hruaitu thlan chhuah, Nobel Peace Prize dawng tawh, Aung San Suu Kyi an hreng chu a dem tih a sawi.
Nilainia thuchah a sawiah President Biden-a chuan, “Vawiin hian sipai chakna hmangtute hrek an ni dawn tih ka puang a ni,” a ti.
“US sorkar hian sipai general-ten US-a Burmese sorkar fund $ tluklehdingawn khat an hman theihna tur chu a dang dawn,” a ti.
Biden-a chuan sipai hruaitu, sipai chakna hmanga mipui sorkar paih thlaknaa bultumte chu hrekna thar hmanga hrek an nih dawn thu a sawi bawk.
US hian tun kar chhung hian a hrekna hmasa chu a puan rin a ni a, Myanmar rama thil an thawn luh thin tam tak tihtawp a ni ang a, damdawi leh nunau tanpuina thil chauh thawn a ni dawn tih president chuan a sawi.
Tar lan tawh thin angin mipuiten an ram hruaitu tura an thlante chu Myanmar-ah hian sipaiten hrengin Myanmar Senior General Min Aung Hlaing-a kaihhruaina hnuaiah February 1, 2021 zing atang khan an awm mek.
Sipaite hian November thlaa an inthlan result pawm lovin hetiang hian an che a, ram pumah emergency puangin an khawpui lian pahnihah chuan zan lamah curfew an puang bawk.