Power Mega Watt 20 pe chhuak thei tur, Vankal Solar Park siam hna kalpui mek chu contractor leh khaw mipui inhmuh thiam loh avangin hna kal lai tihtawp a ni a, hemi buaina ching fel tur hian inbiakna neih mek a ni.
Vankal khawtlang hruaitute hnen atanga thudawn danin Vankal Solar Park siam hna kalpui mekah Vankal khawtlangin an ram an pek chin baka contractor-ten solar module an phun avangin December thla chawhma lam atang khan khawtlangin an ram pek chin baka hnathawh chhunzawm an phal lo a, hemi chungchangah hian P&E Department leh khawtlang hruaituten inbiakna an nei mek a, January 20-a an inbiak leh hunah chuan inremna an siam theih beisei a ni.
Vankal VCP K. Lalchhungliana’n a sawi danin Vankal khawtlangin solar park siamna tur ram an pek hma hian P&E department leh contractor ten inremna hrang hrang an siam a, park atan hian kum 2018 khan khawtlangin ram an pe leh a, heta an ram pek bakah hian kum 2021 khan vawi hnih ram an pek belh leh a, heta an ram pek belh bakah nikum kum tawp lam khan contractor-ten solar module/plate an lo phun avangin an ram pek baka hnathawh phal lovin an ram pek baka hmalakna awmte chu Vankal khawtlang hian an chawlhtir ta a ni.
Vankal Solar Park-ah hian nikum December khan Power MW 5-10 vel hawn hman tum a ni a; amaherawhchu, ram chungchanga buaina awm vang hian hawn theih a ni ta lo ni.