- Rinfela Zadeng
Pathian khawngaihnain kum thar 2023 kan lo thleng leh ta reng mai a, Pathian hnenah lawmthu i sawi ang u. Kum hlui liam ta leh hun kal tawh chu kan siam that phak loh leh kohkir theih loh a ni a. Kan tihsual leh kan tih dik loh zawng zawng te atanga insiamthain, kum tharah thlarau thar nena bul tannin, Pathian rinchhanin ke i pen ang u tiin kan insawm a ni.
Thlarau thara rawng kan bawl theih nan kan taksate Pathian hnenah hlan thar ang u
Kan Bible chang tarlan Rom 6:4-6 khi ka chhiar chuan ‘Sual thihsana Kristaa nun’ tih thupui chhunga a mi a ni tih kan hre awm e. Tirhkoh Paula hian keini hi Lal Isua Krista thihna leh thawhlehna tawmpuitu kan nih avangin, kan sualna zawng zawngte kalsana Lal Isua Krista min chhandamna leh sual min hnehsakna nun chu tawmpuiin, nun thara nung turin min hrilh a ni tih kan hre awm e. Rom bung 6-na hian a sawitum tlangpui chu – dan hmangin sualna hi kan hneh thei lo a; Pathian khawngaihna avanga Lal Isua Krista kan rinna chauh hian sual chu a hneh a. Lal Isua Krista zuitu leh ringtute chuan Pathian khawngaihna avangin Lal Isua Krista kan rinna hmangin sual kan hneh thei a ni tih hi a sawi tum ber chu a ni.
Rom 6:4-6 ah hian Baptisma chungchang kan hmu a; Baptistma kan chana tuia kan in hnim/chiah/thlawr hian Lal Isua Krista nen phum kan ni a; tui atanga kan thawh leh chiah hian Lal Isua Krista nen nun thar kan nei tih a entir a ni tiin ESV Global Study Bible chuan he lai thu hi a hrilhfiah a ni. Kristian te hian sual kan ti loin kan ngaihtuah miah lo tur a ni lo a, mahse sual thuneihna leh sual bawihah erawh kan tang tawh tur a ni lo tiin Paula hian min hrilh a. Lal Isua ringtu Kristiante chu hmalam panin kan thang chho zel ang a; puitlin lam panin Pathian duh zawng tiin thuawihna nen hmalam kan pan zel tur a ni tiin he lai thu hi ESV Global Study Bible chuan min hrilhfiah.
Inpekna thar nen rawng i bawl ang u
Rom 12:1-3 thu khi kan chhiar chuan, ‘Kristaa nun thar’ tih thupui chhunga mi a nih thu kan hmu ang. Kan taksa leh rilru hi Pathian tana hman theih leh hman tlak ni tura inhlan turin Paula hian min ngen tih kan hmu. Kan taksa leh thlarau hi Pathian ta a ni a; chuvangin Pathian tana hlan tur leh hmantlak ni turin kan inbuatsaiha kan inpek hi kan tihtur leh mawhphurhna a ni. Chutianga nun thar, Lal Isua Krista avanga kan neih chu a taka hmang chhuaka kan rilru leh taksa ngei chu chetchhuahpui turin Paula hian keini hi min ngen a ni.
Tun lai khawvel sualna hrang hrang – sum leh pai neiha hausak thut duhna, thuneihna leh lalna duhna, mi hriathlawh leh lar chakna – heng zawng zawngte hian min thlemin sual kawngah min hruailuh a tum a. Mahse chungte chu Pathian duh zawng a nih lohzia te, Pathian neitu leh a thuawih tak taktu tan chuan sual a nihzia hrechianga tlansana danglam tur kan nihzia Paula hian min hrilh a ni. Pathian thuawih leh dikna te hi tun lai khawvelah kan retheihpui ta hial em ni tih khawpa khawvel chhe tawhah kan awm mek a. Mahse chu tak chu Lal Isua ringute kan danglamna leh kan lanfiahna tur a nihzia Paula hian min hrilh a. Kan rawngbawlna chhunzawm zel turin min fuih a ni a; heng thil dik lo leh tha lo laka fihlim thei nun hlutzia te hre turin min fuih a ni tiin ESV Global Study Bible chuan a sawi.
Pathian tana nun hi thlarau thar dawnna a ni
Thlarau thar dawng tur hian eng emaw mamawh bik kan nei hran lo a; ti deuh chiai chiai emaw eng emaw mak dang tak ang emaw hi kan mamawh lo. Pathian tana nun tlat. Pathian tana rinawm tlat, Pathian avanga chauha sual kawng zawh duh tlat loh te hi thlarau thar dawnna chu a ni. Chutianga Pathian tana mi rinawm tlat chuan Thlarau Thianghlim tanpuina leh pawlna hi a dawng ngei ngei a, nun tam a neih belh ngei ngei bawk.
Kum tharah hian Pathian tan hian rinawm tlat ila, kan ram leh hnam, kan chhungkua leh keimahni hian thlarau thar kan dawng ngei ngei ang. Pathian tana nung tak tak duh lo, midang hmuh loh lai leh mi dang hriat loh laia Pathian tana rinawm thei lo kan nihna hian kan ram leh hnam, chhungkua leh mi mal nun thlengin a nghawng a. Sum thianghlim lo leh dik tawk lo hmanga hausakna te kan um zuia kan buaipui luih luih chhan hi – Pathian tana rinawm taka awma reitheih kan peih loh vang a ni.
Speaker tha leh thusawi thiam hi kan mamawh ber chhanna a ni lo; anni chu a hmanrua mai a ni. Kan mamawh ber zawk chu Pathian tana rinawm taka nun mai hi a ni. Chutianga kum bul kan tana kan damchhung hun hi kan hmang thei a nih ngat chuan Thlarau Thianghlim hian min chenchilh reng ang a. Chauh chang leh khawro ngawih ngawih channgte, beidawn chang leh harsa tih chang te nei mah ila, kan bo hlen ngai lo ang. Thlarau Thinghlim chuan kan bulah kan sawmna nghakin min nghak reng a; Pathian tana rinawm tlattu nun luahkhah hi a hna a ni.
Kum 2023 hi kan tan malsawmna lo ni se; Pathian Tlarau Thianghlim nena kan dam chhung nun bul tanna lo ni mawlh teh se!