Aizawl : Nehru Yuva Kendra (NYK)- in nimin khan Vista English School, College Veng, Lawngtlai-a zirlaite leh NYK hnuaia youth club te nen National Youth Day vawi 39-na an hmang a. Lawngtlai District Information & Public Relations Officer C. Lalhruaitluanga’n a hmanpui.
Lawngtlai DIPRO chuan kumina National Youth Day thupui -Developed Youth – Developed India- (Thalaite hmasawnna hi India ram hmasawnna a ni) tih hmangin zirlaite leh thalaite fuihna thu a sawi a. “Ram hma hun chu vawiina ṭhalaite kutah a innghat” tiin, ramin hma hun eng tak a neih theih nan tun aṭanga inbuatsaihna ṭha neih a ṭul tih a sawi.
Zirlaite chu mahni hma chauh ngai lova, ram tana chhawr tlak nih tum tura chahin, zirna ngaipawimawh tur te, ruihhlo laka inthiarfihlim tur leh tumruhna nena an hmaa tih tur awm te hlen tum tur tein a chah bawk.