Aizawl : DBL Company Pvt. Ltd-in CSR fund Rs. nuai 6 an pek hmanga sak Puilo khuaa Health Clinic Centre building chu nimin khan bialtu MLA Dr L Thangmawia’n a hawng.
Puilo khuaa Health Clinic Centre a thawk tur hian Health Worker pakhat leh staff pakhat dah nghal an ni a. Bialtu MLA chuan a bial chhunga khua zawng zawngah Health Sub/Clinic Centre a awm kim tak thu sawiin, Lengteng bial mipui ten an thawhpui that zia tilangtu a nih thu a sawi.
Puilo khuain Health Clinic Centre an nei ta chu a lawmpui thu sawiin, bialtu MLA chuan “tunah chuan Puilo atanga damlo, naupai leh vaccine lak ngai ten khawdang an pan zel ngai thin chu a lo tawp dawn ta a ni” a ti a. Puilo khawtlang pawh he centre tichangtlung tura an tih theih apiang ti tur leh thawktute tha taka thawhpui turin a chah. A dilna ngaipawimawha Puilo-a Health Clinic Centre building sakna tur sum petu DBL Company te chungah bialtu MLA chuan Puilo khawtlang aiawhin lawmthu a sawi bawk.
Puilo khuain Health Clinic Centre thar hawnna ah hian sum tumtu DBL Company Director Rajesh Beniwal leh a thawhpuite bakah Addl SPD Samagra C. Laltha- nzira leh Khawzawl SDC Obed Lalmalsawma te pawh an tel a ni.