Aizawl: Nilaini khan Mizoram Rajya Sabha MP K.Vanlalvena chuan Union Defence Secretary Giridhar Aramane IAS hnenah lehkha thawnin, Border Road Organisation (BRO) hotu thenkhatte lakah disciplinary action la turin a ngen.
A lehkhaah hian K Vanlalvena chuan kum 2020-ah Ministry of DoNER-in NEC kaltlangin Mizoram chhimchhak lam leh Chin Hills capital inkalpawhna tur, Sangau to Saisihchhuah double lane road laihna tur cheng vaibelchhe 66 (Rs 66 crores) sanction a ni a, he hna thawk tura thlan BRO te hian kawng laihna pawisa sanction a nih hnu kum hnih aia rei liam hnuah pawh metre khat leka thui kawng an la laih loh avangin sanction hi withdraw leh tura ruahman mek a nih thu a tar lang.
K Vanlalvena hian Chin hills khawpui, Hakha atangin Saisihchhuah hi China puihnain Myanmar sorkar chuan kum thum kal ta khan double lane kawng a lai tlang tawh tih a sawi a. Hetih laia, kawng laih hna thawh a la nih loh thu leh, Champhai – Siaha defence road thui tak laih tawh leh hun leh sum tam tak sen ral tawhna ni si, Thingsai leh Pangkhua inkar kawng laih tur thawk duh loa kum tam tak hna an chawlh tawh hnuah an tawpsan ringawt avangte hian, BRO hotute hian tribal mipuite hmasawnna an ngai pawimawh loin, ram leh hnam himna an ngaihthah avangin, disciplinary action hi a rang thei ang bera lak hi thil tih makmawh a ni, tiin Defence Ministry chu BRO te chunga action la turin a ngen a ni.