Aizawl: Tuipuiral Group YMA-in Myanmar sipai sorkarin international boundary palzuta India ram chhungah indo thlawhna a thlawhtir fo leh bomb a thlak chu an dem thu sawiin hetiang thil a thlen tawh lohna tura hma la turin sorkar laipui an phut.
Hemi chungchanga thuchhuah an siamah Tuipuiral Group YMA chuan Myanmar indo thlawhnain January 10, 2023 tlai dar 3:30 bawr vel khan Tuipuiral huam chhungah bomb a thlak a, niminah pawh bomb vawi hnih a thlak chhunzawm leh tih an sawi.
Hetianga Myanmar sipai sorkarin India palzuta indo thlawhna hmanga ramri hrul mipui, lo neitu leh Tiau balu laa eizawngte an rum thaih fo avang hian ramri hrula lo neia eizawng leh hna hrang hrang thawk thinte chu hna pawh thawk ngam tawh lovin an awm tih an sawi a, Myanmar sipai sorkar chet dan chu a rang thei ang bera titawp nghal turin India sorkar chu na takin an phut tih an thuchhuah ah chuan an tarlang bawk a ni.