A thu sawi avanga India ram puma boruak tang tak siamtu, a bik takin Muslim-ten an huat em em, BJP thupuangtu chawlhtir mek, Nupur Sharma-i chu vauna tam tak a dawn avang leh a him nan Delhi Police chuan silai kawl an phalsak.
Sharma-i hian TV-a thil sawihonaah Prophet Mohammed-a a sawi bawrhbang a, hei hian Muslim-te thin a tirim tak zet.
Delhi Police chuan a dil angin silai kawl phalna (license) an pe ta niin Ningani khan thuneituten an sawi.
Supreme Court chuan July khan May 26-a a thil sawiin ‘ram pum boruak a tihtan avangin ngaihdam dil’ turin a lo ti tawh a. Hemi hnu lamah pawh a nunna atana hlauhawm khawpa vauna a dawng zui reng tho.
Amah thlawptute ngei pawh vau leh tawrhtir zui an ni a, mi pahnihin an thih phah tawh nghe nghe.
June thla khan Maharashtra-a Amravati-a cheng, pharmacist Umesh Kolhe chu Sharma-i a lo tan avangin thah a ni a. A hnu ni rei vak lovah social media-a a thlawp thu tar langtu, Udaipur-a puan thui chu a dawrah thah a ni bawk.
Court sang bera a aiawha ding dan hre mi chuan Sharma-i hian a nunna atana hlauhawm khawp vauna a dawng nasa hle a, heng vaunate hi ‘thil tak tak, ngaihven ngai’ a nih thu a sawi bawk.
Sharma-i’n vauna a dawn zingah hian mi pakhatin video siama a hrawka zaia a vauna leh Uttar Pradesh-a cheng pakhatin nasa taka sawisela a lu tansaka a vauna pawh a tel.
Supreme Court chuan July thlaa thutlukna a siamah, “Ram puma mite thinlung a tialh a, ram chhunga thil thleng hrang hrangah hian he nu hian mawh a phur a ni,” a ti.
Judge-te chuan, “A tawng a thlahdah a, TV-ah sawiin ram pumah boruak a titang a. Kum 10 lai dan hre mi niin a thawk tawh a ti bawk si a… a thil sawiah hian ram pumah ngaihdam a dil tur a ni,” an ti bawk.