Russian defence ministry chuan Gen Surovikin-a thlaka mi dang dah hi ‘an sipai pawl (branch) hrang hrangte an inpawh zawk theih nan leh Russian sipaite enkawlna leh kaihhruainaah tha zawk a awm theih nan’ tih a nih thu a tar lang a. Hetih mek lai hian President Putin-a hian mi an rûn meknaah thuneihna nasa zawk a neih theih nana a tih nia sawi an awm bawk.
President Vladimir Putin chuan Ukraine-a Russian sipai commander lawk ber chu a thlak a, thla thum chauh a ho hman.
Chief of the General Staff Valery Gerasimov chuan Putin-a’n ‘special military operation’ tia a sawi, Ukraine an rûn mekna chu a ho tawh dawn a ni.
Gen Gerasimov-a hian Sergei Surovikin a thlak dawn a, ani hi tun hnaia Ukraine-a an energy hmunpuite an beihnaa kaihruaitu a ni.
Sipai hotu lian an siksawi hi Russian-ten tun hnai thla eng emaw zat chhunga tlawmna an neih hnuah Ukraine khawchhak lamah hma an sawn thar leh tih an sawi mek laia tih a ni.
Russia hian Ukraine hi February 24 atang khan a rûn tan.
Gen Gerasimov-a hi kum 2012 atanga tuna a hna chelh lai chelh tan niin Soviet hun hnu lama Russian chief of general staff ni rei ber a ni tawh.
A thlak tur, Gen Surovikin-a hi a thachhangdawltu ni lai niin tun hma lama indona hrang hrang, Russia-in Syria-a beihpui an thlak lai leh Aleppo khawpui-a bomb a thlaktir danahte a chet dan a nat thin em avanga ‘General Armageddon’ tia an sawi thin a ni.
October thlaa Kyiv an rûn meka hotu atana dah a nih hnu lawkah Ukraine ram energy hmunpui nasa taka bei turin ruahmanna a siam nghal a. A chetna avang hian tun thlasik mek chhung hian Ukrainian civil mi maktaduai telin power leh tui an neih loh phah.
Russia-te chhim lama Kherson atanga an inhnuhdawh pawh a hun laia thleng niin hei hi Ukrainian-te hlawhtlinna lian ber pawl a tling nghe nghe.