Aizawl: Mizorama media workshop neia Aizawla cham mek, Sikkim IPR officer-te leh journalist-te chuan Ningani khan Aizawl Press Club an tlawh a, MJA hruaitute leh member-ten lo dawngsawngin an inkawm.
Sikkim sorkar bultumin Sikkim-a Information & Public Relations officer pangate leh journalist 15-te chuan Indian Institute of Mass Communication (IIMC), Mizoramah media workshop an nei mek a. Workshop hi Sikkim journalist-te tan bika buatsaih a ni a, January 9, 2023 khan tan niin, January 13, 2023-ah zawh a ni ang.
Media workshop-a Sikkim atanga telte chuan nimin khan Aizawl Press Club an tlawh a, MJA Gen. Hqrs hruaitute leh member eng emaw zatin lo dawngsawngin inkawmhona hun an hmang.
MJA hruaituten MJA chanchin tlangpui leh Mizorama media hrang hrangte dinhmun leh Mizoram chanchin tlangpui an sawi a, Sikkim journalist-ten an chanchin tlangpui an sawi ve bawk.
Sikkim atanga kalte hnenah hian MJA chuan MJA Golden Jubilee souvenir magazine leh sash bakah Mizo pen-stand a pe theuh a; Sikkim khualten memento leh thilpek dangte MJA tan an hlan ve bawk.
Sikkim journalist-te leh IPR officer-te hian Aizawl Press Club conference hall leh MJA Public Library-te pawh an en a ni.
Sikkim journalist-te hi nimin khan insem darhin Aizawla hmun thenkhat an tlawh kual a, an tlawh zingah IPR Directorate pawh a tel. Aizawl Press Club tlawhtute bik hi IPR officer panga leh journalist pali an ni.