Sri Lanka-ah hian thil man sangin ziaawm lam a la pan thei lo va, nikum atang khan a sang zawng zelin a la kal a. Thla hmasa khan ei leh in man chu a hma kum hetiang hun laiin 65% zetin a to tawh zawk.
World Food Programme (WFP) chuan Sri Lankan maktaduai riat vel, an rama cheng hmun thuma thena hmun khat vel zet chuan ei leh in tur kham an nei lo niin a chhut a, a bikin thingtlang lama mite an tam hle tih a sawi.
Eibara an hniam lutuk avang hian nikum khan ram mipuiin sorkar nasa takin an bei a, president tang lai pawh July khan ram dangah a tlanchhiat a ngai hial.
World Bank chuan Sri Lanka economy hi kum 2022 khan 9.2% zetin a tlahniam a, kuminah chuan 4.2%-in a tlakhniam belh leh dawn niin a chhut lawk.
Beijing hi Sri Lanka pawisa pukna ber niin $ tluklehdingawn 7 vel bain India hnenah $ tluklehdingawn 1 vel a puk bawk.
China hi thil reng ranga a ban ber a nih avangin khai chhuah an nih lehna turah pawh hian mawhphurtu lian ber nia ngaih a ni.
US palai, Julie Chung chuan, “Sri Lanka hian tihkhawtlaina hun an neih tawh loh avangin an pawm thuai kan beisei,” tiin BBC Newsnight hnenah a sawi.
“Sri Lankan mipuite tan China hian IMF-in rawtna a neih hi an tihsak ngei ka ring,” a ti.
India leh China hian leiba ngaidam mah se Sri Lanka hian mi malah sum a puk nasa tho va, hei hi buaina dang ni thei nia sawi a ni bawk.