COVID19 avanga harsatna thlengah khan Aizawl district-in tanpuina sum CM relief fund Rs 8,80,94,878, PM Cares Rs 2,79,80,224 leh State disaster response fund (SDRF) Rs 3,86,69,649 a dawng.
Aizawl District disaster management authority thutkhawm, Aizawl Bawrhsap Dr Lalhriatzuali Ralte hova neihah he thu hi tarlan a ni a. COVID- 19 do kawnga hman tur sum te hi COVID- 19 vanga ram pawn atanga rawn haw te hmuah nan leh an khua theuha thlahna atana lirthei hman man atan te, Quarantine na hmuna mutbu leh mamawh tul dang lei nan te, Quarantine facilities a awm te ei leh in leh tul dang atan te, Medical equipments (PPE, mask, gloves, sanitizer etc) lei nan te pawh hman a ni.
Sum hmanna langsar dang zingah LLTF/VLTF te chhawmdawlna, Quarantine facilities electric leh tui bill, Migrant workers te chhawmdawina, chhungkaw harsa zual leh home/centre hrang hrangte tanpuina, COVID19 vanga boral te ralna (mi 413 ral an ni tawh) te pawh a tel.
COVID19 dona atan bakah Aizawl district-in State disaster relief fund (SDRF) Rs 1,20,00,000 a dawng a, sum hmanna langsar zingah khuarel chhiatna avanga chenna in chhia te tanpuina, khuarel chhiatna thleng avanga nunna chan te ralna,khuarel chhiatna avanga damdawi in-a inenkawl ngai te tanpuina, khuarel chhiatna thlenga chhanchhuah hna thawhna, khuarel chhiatna avanga huan thlai chan te tanpuina te pawh a tel a ni.
Aizawl District disaster management authority chuan state sorkar thurawn bawhzuiin, Aizawl district-a chhiatna thlen palh theihna hmun hlauhawm te thawmthat hna thawh dan turah ruahmanna siamin, state sorkarah ruahmanna 200 chuang a thlen tawh.
Kum 2022 atanga tun thlengin Aizawl district-ah lung lum, leimin, leikhi leh kangmei chhuak avangin chenna in 32 a chhe tawh a, mi 8 in hliam tuarin nunna chan mi 6 an awm tawh bawk.