Neitu thar hnuaiah Chelsea in beiseina nen season bul an tan. An tum ang leh rinlawk ang a ni hauh lo. Coach an thlak hnuah pawh thil a danglam lo.
Ningani zanah an buaina in kiam lam a la pan thei lo. West London derby-ah Fulham nen an inhmachhawn a, 2-1 in Blues an tlawm.
Craven Cottage-ah Chelsea an che buai nasa. Beiseiawm angreng takin bul tan mahse thil a kal fuh lo chho. Player lakluh thar Joao Felix-a’n bul a tan a, a che vel in mit a la. Mahse second half-ah Kenny Tete hlauhawm taka a tlawh avangin hnawhchhuah a ni.
Blues midfielder hlui Willian chuan first half-ah mualneitu team goal hmahruai a khung a, Marco Silva pawlte an phur.
Blues defender Kalidou Koulibaly chuan second half tan tir lamah an si phurh a sut a. Chelsea in insiamthat an tum laiin kim lova an khelh a tul ta si a. Tam zawk an nih hnuah Fulham tan Carlos Vinicius chuan chakna goal a khung a. 2-1 a hnehna an chan avangin Premier League-ah paruknaah an inhlangkai. Chelsea erawh 10-naah an awm a ni mai lova, point 10 in top four an hlat tawh.
Manager Graham Potter hnuaiah inelna hrang hrangah match 10 an khelh tawh atangin vawi hnih chiah an la chak.
Fulham manager Silva chuan, “Chelsea hi club lian an ni a, team tha ber ni tura induang an ni a, budget-ah phei chuan kan inthlau hle. Hei vang hian kan fans te tan zan duhawm a ni a, kan club leh fans te kan lawm tlanzia hun a tawp rual khan a hriat nghal hle.” tiin a sawi.
Chelsea boss Graham Potter chuan, “Zanin kan result in kan dinhmun chiang takin a hril. Thil kal dik lo thei zawng zawng chu a kal dik lo vek.”
“Joao Felix kha inkhelah a che tha hle, red card hma zawng khan a thiamzia a lang. Foul erawh a pawi a, forward te foul dan thin a ni ber.” tiin a sawi ve bawk.