Aizawl: MNF Adviser Prof F. Lalnunmawia, MLA, chuan an sorkar tirha chief minister-in Delhi-a a lo vuak dup tawhte chu tunah chuan a hmin tawh tih a sawi.
Nimina Mizo Hnam Run chhung inkhawmah thu sawiin Prof F Lalnunmawia chuan, “Kan chief minister-in Delhi tlanga a lo zuk vuak dup tawhte kha, tunah chuan a hmin ta. Hun harsa tak karah kan sorkar hmalaknaah lawmna tur tam tak a awm,” a ti.
Horticulture Develpment Board Vice Chairman ni bawk hian, “CM Zoramthanga’n an sorkar tirh lama Delhi tlanga a lo zuk vuak dup tawhte chu Covid-19 hri leng avangin khawtlai deuh mah se tunah chuan a hlawhtlinna an hmu tan mek a, Mizoram hmasawnna tur cheng vaibelchhe tam tak senna tur project-te pawm a lo ni ta,” tia sawiin, eptu party leh mi thenkhatten fiamthu thawh nana ‘vuak dup’ tih hmangtute pawh tunah chuan an heh a hil tan ta tih a sawi.
Chief minister leh minister-ten Zoram hmasawnna atana an thawh nasat avang hian eptu party-ten an helh a, thu phuahchawpin CM leh sports minister induhsak bik angin thu an vawrh darh mek nia sawiin, “MNF sorkarin hmasawnna hna tam tak a thawh karah eptute sawiselna leh puhchhiatnate chu sorkarna siamtute chanvo ve renga ngaih theih a ni. Balhla pawh a rah that poh leh do nasat a ngai thin ang hian, chak taka hmala mek sorkar hian do leh sel a tawk zel ang,” MLA-in a ti.
Mizo Hnam Run inkhawm hi Rochhunga Ralte, Ex MLA-in a kaihruai a ni.