Myanmar ram hruaitu, sipaiten an paih thlak tak, Aung San Suu Kyi chuan a dan hre mite kawmna hun pe turin thuneitute a ngen nawn leh a, a hmaa a dilnate hnawlsak vek an ni.
Kum 75 mi ni tawh, Nobel Peace Prize pawh lo dawng tawh, Suu Kyi-i hi Thawhtanni khan Nay Pyi Daw-ah video-link hmangin court-ah a thubuai ngaihtuah chhunzawm leh a ni.
Natural disaster management law section 25 hnuaiah thubuai thar siamsak a nih thu a dan hre mi, Min Min Soe chuan a sawi a, thubuai paruk a awrh mek.
Sipai lamin an khinna zawng zawng hi a paltlang zo lo a nih chuan dam chhunga politics khel thei tawh lo tura hremna hial a tuar thei.
A thubuai neih zingah hian Myanmar official secrets law palzuta an puhna chu a ngaihtuahawmna ber a ni.
Sipaiten Suu Kyi leh a thawhpuite an man duh loh vanga mipuiin nawrhna an huaihawt kal zel chuan tawp lam aiin zual lam a pan telh telh bawk a. Assistance Association for Political Prisoners-te chuan sipai rorelna hnuaia ni 70 an awm chhungin civil mi 700 chuangin nunna an chân tawh niin a chhinchhiah a, mi 3,000 chuang an man tawh bawk.
Sipaiten an tha an thlahdul duh bik lohna karah lungawi lohna lantirtuten tha an thlah duh bik chuang lo.