Second half-ah forward Paulo Dybala chuan goal pawimawh a khung a. AS Roma in 1-0 a hnehna changin Coppa Italia round of 16 inkhelah hnehna an chang.
Rome a Stadio Olimpico a inkhelah Jose Mourinho pawlten Genoa an mikhual a. Minute 90 chhung an goal venghimin an club chanchina a tum 10-na atan Italian cup champion ni turin ke an pen chhunzawm.
Argentine forward hi inkhel bul tantu zingah telh a ni lova, mahse second half-ah dahluh niin minute 64-naah goal a khung a. Goal sir kilah chep tak atangin a pet lut mawi hle.
Roma coach Jose Mourinho chuan inkhel zawhah, “He team hian a theihtawp a chhuah ziah a, hei vang hian a ni ka player te pawh hi ka ngainat hle. Theihtawp chhuah hi chuan a bak hi beisei leh tur a awm chuang lo.”
“Khelh that ni leh khelh that tawk loh ni te chu a awm vek a, mahse theihtawp kan chhuah chuan sawisel tur a awm lo.” tiin inkhel zawhah a team a fak.
Inkhel dangah Fiorentina in Stadio Artemio Franchi-ah Sampdoria an mikhual a. Antonin Barak goal khung hmangin 1-0 in an chak.
Coppa Italia round of 16 hi khelh chhunzawm a la ni dawn a. Karleh Thawhlehni zanah Serie A hmahruaitu Napoli an inlan anga. Ningani-ah Atalanta, Lazio leh Juventus te an inkhel ve leh ang.