Indian Prime Minister Narendra Modi chuan Zirtawpni khan luipuia zin chi lawng, khawvela lian ber chu Varanasi, Uttar Pradesh-ah a vai liam.
MV Ganga Vilas an tihah hian a zin chhuah hmasak berah Swiss khualzin mi 32 chuangin Bangladesh kaltlangin Dibrugarh, Assam thleng an zin ang.
Modi-a chuan, “He khualzin phur lawng (cruise) lian hmang hian India khawchhak lam chu tourism khawvelah a lang tawh dawn a. Ganga lui kam hi zalenna kan neih atangin kum rei tak chhung tihhmasawn a ni miah lo hi a vanduaithlak tak zet a, a kama cheng tam tak chuan hna zawngin hmun dang an pansan hial a ni,” a ti.
MV Ganga Vilas hian hetiang lawng India-a sak hmasak ber a ni a. A zin chhuah hmasak bera chuang tur Switzerland atanga khualzinte hi nasa taka lawm an ni a, an zin chhuah hmain Varanasi-ah hian sakhaw hmun leh hmun hlui pawimawhte an tlawh hmasa ang.
Prime minister chuan zin chhuak turte hnenah hian, “India hian i mitthla ang thin zawng zawng kha a nei a, chu bak pawh chu a nei. India hi thua sawi fiah mai theih pawh a ni lo va, thinlung atanga tawna fiah chi a ni,” a ti.
Union Port, Shipping & Waterways Minister Sarbananda Sonowal chuan, “He lawng hmang hian ram dang khualzinte chu India leh Bangladesh-a art, culture, history leh thlarau lam thil te a fanpuiin a kawhhmuh dawn a ni,” a ti ve bawk.
Lawng hmang hian ni 51 chhung zinin km 3,200 vel an zin dawn a. Lui 27 zet zawhin hmun hmingthang tak tak 50 lai an tlawh ang.
Uttar Pradesh Tourism Minister Jaiveer Singh chuan lawng hian khualzinte tlawh thin hmun 50 a tlawh dawn a, heng zingah hian world heritage site, national park, lui lam phai leh a hualtu tlangram te a tel dawn tih a sawi.
Khawpui tam tak pawh tlawhin West Bengal-a Kolkata, Bihar-a Patna, Bangladesh khawpui Dhaka leh Assam-a Guwahati te pawh an tlawh ang.