Mizoram Pradesh Congress Committee (MPCC) Vice President Lal Thanzara chuan kum 2023 hi tihpalh sorkar MNF tawp hun a ni ta tih a sawi.
Kum 2023 atana MPCC Friday Political Session hmasa ber, Congress Bhavan-a neihah thu sawiin Lal Thanzarah hian mipui nawlpui zingah MNF sorkar nawn leh ring an awm tawh lo nia sawiin, “Anmahni party mi ngei pawhin an inring zo tawh lo,” a ti.
Lal Thanzara hian MNF party sorkar chu inthlan hmaa an intiamnaah an hlawhchham vek avangin an tan beisei tur a awm tawh lo niin a sawi a. MNF-ten sorkarna an chelh tirh atang khan a hotulu ber atangin minister rualten sorkar nawn leh tum tawh lo niawm takin, a theih theihnaah sum an tham bawrh bawrh a. Ram hmasawnna tur tak tak ngaihtuah si loin an sum hmuhna tur contract hna an insiam avang hian sorkar hnathawkten a hun takah hlawh an lak theih loh bakah GP Fund pawh a pe chhuak thei lo a, contractor-te bill an batsak a, tar pension takngial pawh an pe thei lo. Kum 2022-23 chhungin leiba pawh Rs. vaibelchhe 1,119.2 a tling tawh tih a sawi.
MNF sorkar chu dan leh thupek kenkawh chungchangah a hlawhchham tih sawiin, “Kuhva ro tawlhruk pawh an titawp thei lo a, police man theih loh YMA leh kuhva chingtuten an man daih thung. MNF sorkara an hotu sangte hi inrawlh lo nise kuhva ro sumdawnna hi tihtawp a harsa lo,” tiin, a inrawlhate hi sorkar mi lian an nih avangin an titawp hlei thei lo niin a sawi.
ZPM chungchang sawiin Congress vice president hian, enchhin tura inzuar mekte hi enchhin tawh vek an tih sawiin, “Mahni party din ngei pawh chhuahsan leh thin hruaitute hi enchhin zel tlak an ni lo,” a ti.