Lunglei Municipal Council Office, Convention Centre Basement II-a mi chu nimin khan Deputy Chief minister Tawnluia’n a hawng a, LMC inthlanpui neih hun tur la sawi mai theih loh mah se March thla chawhnu lam beisei a nih thu a sawi.
Tawnluia chuan a taka LMC kalpui turin inthlan phawt tur a nih laiin a hun erawh sawi mai theih a la ni loh thu sawiin, “Assembly session nei zawh lam, March thla chawhnu lam beisei a ni,” a ti.
LMC-in subject 15 a enkawl dawn tih a sawi a, inthlanna neih a nih hma pawhin subject-te chu a theih ang angin tihlawhtling tura thawh nghal a ni dawn tih a sawi.
Tawnluia chuan LMC a taka kalpui a nih hunah chuan in sak chungchangah pawh dan hnuaiah vek thiltih a ngai tawh dawn tih sawiin, khawpui changkang leh awmze neia hmasawn siam chu LMC hna pawimawh a nih thu a sawi.
Deputy chief minister chuan MNF party-in kum 2018 inthlanpui dawna manifesto an neih zinga mi, thuneihna semzai tihpuitlin nana pakhat, LMC hlenchhuah a ni ta chu lawmawm tih thu sawiin, tun hmaa awm ngai lo LMC Office-ah officer leh thawktu thahnem tak an awm thar ringawt pawh Lunglei tan thil hlu tak a nih thu a sawi.
LMC office hawnna inkhawm hi UD & PA department secretary Lalmalsawma Pachuau-in a kaihruai a, UD & PA Director H.Lianzela’n report a pe a, Minister C.Lalrinsanga, MLA pathum – Dr.Vanlaltanpuia, Lawmawma Tochhong, leh Dr.K.Pachhunga te bakah district hotute, tlawmngai pawl leh political party hrang hrang aiawhte an tel a ni.
LMC huam chhung chu Lunglei khawpui chhung VC 24 a ni a, ward 11-ah then a ni a; voter 40,541 an awm a. Tuna VC ni lai mekte chu local council-a thlak turin Mizoram sorkar chuan nikum August thla khan a lo rem tih tawh.
LMC atan hian sorkar kum kal laiah Rs. Nuai 80 dah niin kum 2022-2023 atan pawh Rs. Nuai 80 bawk dah leh a ni a; LMC Office hi nikum November 9 atang khan Chief Executive Officer hovin thawktuten an luahlut tawh a ni.