- PC Thang Zikpuia
Mizo Language Committee (MLC) lehkhabu ‘Mizo tawng Ziah Dan’ hi a thu hma hruaia kan hmuh ang hian, ‘lehkhabu ziaktute, zir laite, zir lai bu siamtute leh Bible Society lam pawhina rinrawl bera an hman thin’ a ni àwm a; chutiang taka lehkhabu pawimawh a nih avàng chuan he lehkhabua ziah dan tura an dahte hi rin tlâk leh belh chian dâwl a ni em tia kan lo chik ve hi tih mâkmawh a ni àwm e.
Tuna 4th edition lo chhuak leh ta hi 3rd edition âi pawh khân a mumal lehzual em ni âw tih mai tur a ni a; heti chung chung hian zirna sikul lamah te rinrâwl berah an hmang dâwn a nih si chuan, zir lâite mai bâkah zirtirtute tân pawh lu haina tur a tam hle ang em tih rilruah a awm deuh a. A chhan chu–thu awmze thuhmun reng ni si, ziah dan inang lova dah a tam hle a, hengah hian a khawi zâwk hi nge zirtirtute leh zir lâi naupangte’n an pawm zâwk ang tihah hian buaina tham a awm dâwn niin a lang.
Entir nân–phêk 57-naah ‘sa hmul’ tia a inzawm lova ziah tur an dah chu phêk 228-ah erawh chuan ‘sahmul’ tiin a inzawma ziah turin an dah leh daih a. Phêk 64-naah ‘mit vun’ tia a inzawm lova ziah tura an dah pawh phêk 207-ah chuan ‘mitvun’ tiin a inzawma ziah tur an dah leh daih bawk a. Phêk 70-naa ‘hnutebu’ tia ziah zawm tura an dah pawh phêk 165-naah chuan ‘hnute bu’ tiin a inzawm lova ziah turin an dah leh daih lawi bawk a. Phêk 73-naa ‘kamchhuak’ tia ziah zawm tura an dah pawh phêk 182-ah chuan ‘kam chhuak’ tiin a inzawm lova ziah turin an dah leh daih lawi si bawk a!
Chutiang zêlin phêk 87-naah ‘tawng mawh’ tiin a inzawm lova ziah turin an dah a; nimahsela, phêk 261-ah chuan ‘tawng mawh’ tiin a inzawm lovin leh ‘tawngmawh’ tia ziah zawm turin an dah kawp leh tho a. Phêk 102-naa ‘tih makmawh’ tia a inzawm lova ziah tura an dah pawh phek 250-naah chuan ‘tihmakmawh’ tiin ziah zawm turin an dah leh daih a. Phêk 242-naah ‘thin phû’ tia ziah zawm loh tura an dah lâiin phêk 243-ah erawh chuan ‘thinphû’ tia ziah zawm turin an dah leh lawi a. Phêk 132-naa ‘buh zêm’ tia ziah zawm loh tura an dah pawh phêk 133-naah chuan ‘buhzêm’ tiin ziah zawm turin an dah leh daih bawk a! Phêk 136-naa ‘chaw hai tho’ tia ziah zawm loh tura an dah pawh phêk 137-ah chuan ‘chawhaitho’ tia ziah zawm turin an dah leh daih a. Phêk 137-naa ‘tha fuan’ tia a inzawm lova ziah tura an dah pawh phêk 238-ah chuan ‘thafuan’ tia ziah zawm turin an dah leh daih bawk a. Phêk 227-naa ‘sa ruh’ tia a inzawm lova ziah tura an dah chu phêk 230-naah chuan ‘saruh’ tiin ziah zawm turin an lo dah leh bawk daih si a!
Chu mai a ni lo a, duh zâwk zâwk pawm zel mai tur ni àwm takin phêk 25-naah te pawh ziah dan chi hnihin, ‘tui fâwn’ tia a inzawm lova ziah leh ‘tuifâwn’ tia a inzawma ziah an dah kawp ringawt a. Chutiang bawkin phêk 121-naah pawh ‘âi en’ tia a inzawm lova ziah leh ‘âien’ tia a inzawma ziah an dah kawp a. Phêk 175-naah pawh ‘inrual khai’ tia a inzawm lova ziah leh ‘inrualkhai’ tia ziah zawm an dah kawp leh a. Phêk 126-naah pawh ‘awm nêm’ tia a inzawm lova ziah leh ‘awmnêm’ tia ziah zawm an dah kawp a. Phêk 204-naah pawh ‘mau thei’ tia a inzawm lova ziah leh ‘mauthei’ tia ziah zawm dah kawp lehin, phêk 235-naah pawh ‘tak ngial’ tia a inzawm lova ziah leh ‘takngial’ tia ziah zawm an dah kawp zel a.
Phêk 239-naah pawh ‘thâwk khum’ tia a inzawm lova ziah leh ‘thâwkkhum’ tia ziah zawm an dah kawp leh bawk a. Phêk 263-naah pawh ‘tiau pho’ tia a inzawm lova ziah leh ‘tiaupho’ tia ziah zawm an dah kawp zel a. Phêk 155-naah pawh ‘ngai awh’ tia a inzawm lova ziah leh ‘ngaiawh’ tia ziah zawm te, ‘ngaih tha’ tia ziah zawm loh leh ‘ngaihtha’ tia ziah zawm te an dah kawp zel a. Phêk 164-naah pawh ‘hnâr kawn’ tia a inzawm lova ziah leh ‘hnârkawn’ tia ziah zawm an dah kawp a, phêk 165-naah te pawh ‘hrawk chawm’ tia a inzawm lova ziah leh ‘hrawkchawm’ tia ziah zawm an dah kawp zel mai a ni.
Phêk 156-naah te pawh hian ‘ngawlvei’ tiin ziah zawm turin an dah a; nimahsela, phêk 274-naa ‘zu ngawl vei’ tia an ziahnaah te chuan ‘ngawl vei’ tih hi ziah zawm loh turin an dah leh daih lawi a! Chutiang bawkin phêk 108-naa ‘arbâwm’ tia ziah zawm tura an dah chu, phek 140-naa ‘chhek ar bâwm’ tih an ziahnaah te chuan ‘ar bâwm’ tih hi ziah zawm loh turin an dah leh daih a. Phêk 123-naa ‘arsiek’ tia ziah zawm tura an dah pawh ‘arsi ek kâi’ tih an ziahnaah chuan ‘arsi ek’ tih hi ziah zawm loh turin an dah leh ta daih a. Phêk 193-naa ‘kumsul’ tia ziah zawm tura an dah pawh ‘kum sul vei’ tih an ziahnaah chuan ‘kum sul’ hi ziah zawm loh turin an dah leh daih a. Phêk 206-naah pawh ‘Mim kût’ tiin ziah zawm loh turin an dah a; nimahsela, ‘Mimkût thla’ tia an ziahnaah chuan ‘mimkût’ tiin an ziah zawm leh daih si! Phek5 207-naa ‘mitmu’ tia ziah zawm tura an dah pawh ‘mit mu dum, mit mu vâr’ tih an ziahnaah chuan ‘mit mu’ hi ziah zawm loh turin an dah leh daih lawi si a!
Hetiang teh nuaih a nih avàng hian MLC lehkhabu vuak rema làm lo thai tumtute tân chuan ke chheh a bai duh awm2 mang e tih rilruah a awm a. A hnam pumina Mizo tawng ziah dan tura innghah nâna kan hman tur lehkhabu ber a mumal loh nuaih si chuan, chumi-a innghat zir lâi naupang leh zirtirtute tân mawlh a lu haithlâk lehzual ang tih a rinawm a ni.